Restaurantnan tur rond di Aruba ta contribui sea pa bon of malo na e salud di e comunidad. Ta pa e motibo aki restaurantnan mester ofrece opcion saludabel riba nan menu pa personanan cu kier sali come afo y disfruta di bon ambiente, pero na mes momento cuida nan salud.
Cu tur e diferente cultura cu nos tin na Aruba y tur e diferente opcionnan di cuminda cu nos tin na Aruba, den mesun rosea no tin mucho opcion. Comemento saludabel keto bay ta hopi atras den e careda contra cumindanan no saludabel. Tin demasiado promocion di cumindanan no saludabel cual ta haci cu casi bo no mester tuma decision pa bo mes unda bo ta bay lunch, pasobra na tur skina tin un opcion di cuminda no saludabel.
E poco restaurantnan cu ta ofrece cuminda saludabel ta haya nan mes ta lucha pa mantene nan porta habri, y ta mira cu e no ta rendabel pa habri un negoshi saludabel. Diferente persona ainda ta haya cu comemento saludabel ta caro y p’esey ta scoge pa come algo otro. E ta hopi lamentabel ora cu un persona ta tuma tur pasonan pa e prepara su cumindanan na cas y ta sigui un estilo di bida saludabel, pero e no por bay come na un restaurant nechi pasobra esakinan no tin opcion saludabel. E ta conta pa atletanan tambe cu ta sigui un plan di comemento hopi stricto. Esaki ta haci cu automaticamente un persona cu tin su salud na cuenta ta bira un “outcast” y kisas ya e no por haci actividadnan social asina mas cu su grupo di amistadnan. “Un simpel opcion pa cambia e cantidad di aros pa berdura gesteam riba un plato pe cliente, por nifica cu bo ta gana un fiel cliente cu ta satisfecho cu e servicio y flexibilidad. Di otro banda, falta di e opcion aki por haci cu e persona nunca mas ta bolbe como cu e sa cu no tin nada cu e lo kier come riba e menu.”
Mi ta compronde cu restaurantnan ta negoshinan y nan kier draai riba ganashi, pues ta bin cu productonan cu nan ta convenci cu lo bende mas di dje. Y den e caso aki ta berdad cu cumindanan menos saludabel ta wordo scogi mas lihe cu saludabel. Pero esaki kiermen cu nan ta contribuyendo tambe como sector di horeca na e problema cu tin den comunidad causa pa comemento di demasiado vet satura, salo, sucu y poco vitamina mineral y fibra.
Mas facil y accesibel
Tin hopi factor cu ta determina e rumbo cu cos ta bayendo pa loke ta hende grandi y mas mucha awo, cu sobre peso y obesidad. Nos ta biba den un era cu e estilo di bida ta hopi sinta, tras di computer, television, ipad, mucho poco actividad fisico etc, pero e causa mas principal ta keda cuminda. Hende ta come mas riba caya simplemente pasobra e ta mas facil, nan ta bisa mi. E accesibilidad y costo ta factornan cu nan ta menciona cu ta haci’e mas atractivo pa come riba caya en bes di prepara e cuminda na cas.
Promocion no saludabel na muchanan
No ta nada nobo cu e edad di personanan cu ta sufri di problemanan cu salud a causa di sobre peso a baha. Mas y mas mucha ta wordo diagnostica cu diabetes a consecuencia di come malo for di edad hoben. E mercado cu ta brinda cumindanan no saludabel awo ta dirigi nan promocionnan tambe na mucha. E cahanan di cornflakes yen di sucu, cu imagen di e pelicula Frozen of Spiderman riba dje? Ta strategianan pa pone muchanan pidi nan mayornan pa e producto, como cu e ta dirigi na nan. Pakinan di cos di bebe y come ta bin den un tamaño cu ta duna e impresion cu ta pa 1 consumo, mientras cu si wak e nivelnan di sucu y salo por ehempel, ta determina cu e paki kisas mester wordo reparti den mas consumo.
E ta responsabilidad di cada mayor pa institui habito di come saludabel cerca nan yiu, pero e ta dificil pa un mayor como cu tin demasiado opcion di cumindanan no saludabel cu constantemente ta wordo propaganda. E industria aki ta uno multi biyonario y ta uza tecnica nan psicologico pa haci propaganda pa gara muchanan atencion. Propagandanan na television memey di programanan di mucha, productonan no saludabel den peliculanan di mucha, celebridadnan cu ta idolo di muchanan ta wordo uza pa promociona un producto no saludabel, descuento entre otro. Locual cu e companianan grandinan aki ta haci na mes momento ta tambe, crea un lealtad cu e muchanan cu nan ta hiba cu nan segun cu nan ta crece y bira adulto.
Promocion di cuminda no saludabel mester wordo minimalisa mientras cu promocion di cuminda saludabel mester wordo aumenta, pas asina ‘normalisa’ y reenforsa comemento saludabel cerca muchanan. E debate di si gobierno mester haci algo pa drecha e situacion aki cu ta un problema mundial? pasobra e bendemento y promocion di cuminda no saludabel ta genera basta entrada pa diferente compania y e ta un negoshi exitoso. Sinembargo e gasto cu ta bin pa e cartera di salud despues di tempo, ta mucho mas cual sigur mester tene cuenta cun’e.
