Un restaurant na Hulanda a introduci waiternan robot como un forma pa reduci contacto humano-pa-humano memey di pandemia di coronavirus. E robot cora cu blanco lo saluda cliente, sirbi cuminda y recoge tayonan usa for di mesanan na e restaurant Royal Palace na Renesse.
E robotnan – ainda sin nomber – ta bisa ‘hello y bon bini’ y nan ta bisti sjaal chikito.
“Nan ta yuda nos cu e trabou cu nos ta haci”, segun Leah Hu, kende su famia ta doño di Royal Palace. “Nos ta hopi biaha druk y haciendo mesa limpi y e robot ta duna nos un man extra. Nos no ta desapareciendo. Nos t’aki ainda. Semper lo mester di hende den e industria aki.”
Restaurant na Hulanda ta cera pa varios luna durante e pandemia, y hopi ta cuminsa habri bek, pero cu limite riba e cantidad di cliente permiti. Personal robot, claro, no por haya coronavirus, pero tampoco ta probabel cu nan lo yuda asisti cliente cu alergia di cuminda of haya un stoel pa un grupo cu un baby.
Ta un temporada dificil pa industria di servicio di cuminda, cu restaurantnan perdiendo como 5.5 miyon cupo di trabou na april so. Ta parce poco probabel cu waiter robot lo drenta mercado Mericano pronto (e costo so ta haci nan imposibel pa establecimentonan chikito), pero nan ta comun den restaurant na China pa varios aña caba.
Y ta bal la pena nota cu e ‘hende mashin’ cu ta sirbi cuminda na restaurant na China ta mas un novedad cu un forma di ta mas eficiente; mayoria di waiter robot aparentemente ta hopi malo den haci nan trabou.
