Un restaurant nobo ta bay bin na luga di Cilo City Lounge na Renaissance Marketplace otro siman bao otro gerencia. Nan ta conta nos cu nan no ta bay tuma over Cilo ni e empleadonan cu tabata traha eynan.
Manera cu nos a informa un tempo pasa, e restaurant Cilo City Lounge a haya su mes cu problemanan y mester a cera nan portanan. E empleadonan no a ricibi nan salario completo.
Awor un luga nobo ta bay bini na su luga destina pa habri otro siman cu yama Le Garage Bistro. Esaki ta bay ta un cushina Frances cu lo ta habri pa lunch y dinner.
Restaurant manager Coliene Kievit ta conta nos cu nan no ta bay tuma over Cilo y mester a haci esaki un luga completamente otro. E motibonan entre otro segun e manager ta pasobra nan no kier a carga e debe di Cilo ni tampoco e mal fama.
Dos empleado di Cilo a pasa pa wak si nan ta bay tuma e negoshi over pero a informa nan tambe cu esaki no ta bay ta e caso. Nan tin nan personal basicamente completo caba y djis falta un coki mas pa cuminsa opera. Nan ta actualmente instalando tur cos necesario y drechando e luga cu stoelnan y otro materialnan nobo. Nan no ta na altura riba kico por a pasa cu e doñonan di Cilo tampoco.
Doñonan anterior
Warda Nos Costa a detene e doñonan di Cilo aña pasa december hunto cu un otro persona di personal pa motibo cu nan papelnan di estadia no tabata na ordo. Sinembargo hues comisario a dicidi di laga nan den libertad pa motibo cu nan detencion tabata ilegal. Esaki segun e abogado representando e doñonan Jhoemily Hidalgo y Yvan Moya e tempo ey. Nan ta splica cu nan ta doño pa 50% di Cilo City Lounge cu ta un establecimento popular cu tabata situa na Renaissance Marketplace. Warda Nos Costa a bay indicando cu nan a extende nan estadia sin permiso. Sinembargo nan tabatin un permiso prolonga pa keda na Aruba como turista, segun e doñonan. Despues e detencion, e autoridadnan a informa e abogado cu e doñonan ta deteni y cu nan lo wordo deporta e siguiente dia. Esey a pone cu e abogado bay den apelacion contra e ordo di detencion, mirando cu nan papelnan ta den tramite. Pero esaki ainda tabata pega na Dimas, e instancia di gobierno cu ta procesa permiso di estadia.
Ora cu e abogado a bay dilanti hues comisario, el a dicta cu nan detencion ta ilegal y mester a laga nan den libertad mesora. Pero despues no a tende nan mas di e doñonan.
