Ayera trabounan di restauracion a inicia riba area di mangel parti panort di Spaans Lagoen banda di Franse Pas. Pa motibo di construccion di e brug, a resulta un gran perdida di un area di mangel.
Awor cu Spaans Lagoen ta cay bou fundacion Arikok, su presidente Greg Peterson ta comenta riba e destruccion aki. E ta indica cu conseho di Wageningen Environmental Research (Alterra), DOW y contratistanan, nan a haci nan best pa minimalisa perdida y daño. Tambe nan ta reconoce e necesidad pa purba compensa pa e perdida na Spaans Lagoen. “Hunto cu Alterra, nan a identifica un area panort di e lagoen unda cu lo coba santo y silt anto elimina esey di e sitio.”
Cobamento di canal
Basa riba calculacionnan cauteloso, lo coba un canal den forma di un ‘s’ di 150m largo y 2.5 hancho, e presidente ta bisa. “Esaki lo ta entre lama habri y e caminda. Esaki lo ta suficiente hundo pa mantene e awa na un profundidad di 50cm hasta si e marea ta abao.” Na otro banda Arikok ta informa cu di e canal lo coba pidanan abao na un forma cu lo permiti e parhanan pa come y promove crecemento di mangel nobo. E marea aki lo subi y baha na e bandanan coba anto crea un condicion faborabel pa e mangel por crece. E hanchura di e cobamento, incluyendo e canal central, lo ta 20 meter y lo extende pa 90 meter banda di e canal.
E restauracion ta diseña pa curasha regeneracion natural di mangel, segun e presidente, Pero Parke Arikok ta spera cu ‘e ta duna boluntarionan y miembronan di comunidad local un chens pa planta mangrove tambe na e liña coba’. “Esaki pues por acelera e proceso di crecemento.”
Alterra
Segun Airkok, sr. Lawrence Jones- Walters di Alterra ta laga sa cu ‘e ta contento cu e oportunidad pa crea un area pa compensa e perdida di mangrove na Spaans Lagoen’. E ta haya cu nan tin un bon plan y ta spera cu e ta bira un exito. Semper bo ta den man di e condicion climatologico local cual ta hopi seco of hopi muha, pero Alterra ta comenta: “Nos tin expertonan local vigilando e sitio y tin cosnan cu nos por haci pa traha trampa di lima. Nos ta spera cu comunidadnan local y otronan por tambe involucra nan mes den e plantacion di mangrove pasobra esaki lo trece nan mas cerca di e naturalesa fantastico di Lagoen y Arikok den su totalidad.”
