Despues di e anuncio dialuna pasa di parti di Promer Ministro, sra. Evelyn Wever-Croes, cu a logra haya algun partner pa restauracion di e refineria na San Nicolas, a surgi bastante pregunta y critica den medionan.

Esakinan tabata referi entre otro na e tipo di partner cu a scoge, cu no ta compania cu tin experiencia den e sector petrolero mes, mientras ta trata di un industria bastante specialisa cu ta exigi e conocimento necesario.

Tambe ta keda como interogante con un refineria renoba lo ta bay posiciona su mes den e actual mercado, unda tin un exceso di capacidad di refinacion mundial, banda di e crisis economico mundial cu a haci cu demanda pa tur tipo di producto petrolero a cay drasticamente. Hasta tin comentario di varios agencia noticiero renombra, manera Bloomberg, Reuters, cu no ta sigur cu e demanda pa producto di petroleo lo bolbe na e nivel pre-Covid, debi na e desaroyo grandi cu tin riba tereno di energia renovable, cu ta haci perspectiva pa inversion grandi y di largo plazo den un refineria un emprendimento bastante improbable. E autoridad mundial riba tereno di energia, International Energy Agency (IEA) tambe a publica tocante e posibilidad cu petroleo lo no bolbe mas na e nivel anterior. Esaki ta refleha tambe den e plannan di tur empresa grandi internacional den petroleo, manera Shell, BP, ExxonMobil, ConocoPhillips, Total, entre otro, cu ta reorientando nan inversionnan den direccion di energia renovable, y no ta sigui solamente den petroleo.

Poco labor local disponible

Banda di e consideracionnan na nivel genera aki, tin algun interogante tocante e situacion local den cual e eventual renobacion lo mester tuma lugar. Un di nan ta trata di e disponibilidad di labor cu experiencia den refineria. Bon Dia Aruba tabatin un conversacion cu un experto Arubano cu ta biba den exterior, pero conoce e refineria di propio experiencia, cu a duna nos su opinion pero tabata desea di keda anonimo. El a mustra nos riba e probable necesidad di importa gran parti di e forza laboral cu lo tin mester pa un operacion asina. Confirmando cu den e fase di recuperacion di e refineria por bien tin necesidad di e 2000 cuponan di trabao, e ta mustra tambe riba e probabilidad cu un parti chikito lo ta disponible na Aruba mes. El a indica cu un parti di esnan cu a sali despues cu e refineria a cera definitivamente mientras tanto ta hende na edad di pension caba, mientras cu otronan a bandona e isla y a sigui den petroleo na otro pais, o a scoge otro rumbo den nan bida. Den e añanan cu a transcuri, no tabatin empleo y tampoco anto necesidad pa train hende den e profesionnan tipico cu un refineria ta exigi. Den e fase di restauracion lo mester di welder specialisa, boiler makers, pipe fitters, etc., y despues ora e planta ta opera, mester di hende cu tin experiencia den maneha proceso, loke tambe ta mustra un desafio localmente.

Segun e experto, esey pa e compania mes no mester ta un problema, por importa tur labor necesario, pero si lo ta na su lugar pa no crea ilusion cu e proyecto aki lo bay haci tanto pa resolve e desempleo grandi cu tin actualmente na Aruba, cu ta principalmente di hende cu no tin ningun experiencia den petroleo. E beneficionan lo ta pa esnan cu haya trabao, local of no, cu ta crea mas poder di compra y ta genera entrada pa AZV, SVB y gobierno mes. Si en berdad lo tin un refineria na Aruba atrobe, loke no ta parce algo factible mirando e contexto internacional, y cu ta algo pa e proximo 30 aña por lo menos, anto lo mester haci un esfuerzo grandi pa inverti den educacion y training specifico pa e rama industrial aki. Riba e punto aki, y otro mas, lo mester bin claridad proximamente.