Sindicato SEPPA ta haya cu e “responsabilidad social di un gobierno tambe ta cana hunto cu su nivel di consenshi”. E ta bay hopi mas leu di simplemente respeta si of no derechonan laboral di trahado. Ya cu esakinan ta responsabilidad den sentido estricto y simplemente ta trata di obligacionnan legal cu un Estado di derecho mester cumpli cun’e.
Pero e responsabilidad social di gobierno cu e ta lubida y cu nos kier mustra riba dje ta bay mas leu, esta e responsabilidad pa busca pa mehora condicionnan di bida, den educacion, vivienda, etc… Pues e responsabilidad aki ta bay mas profundo den nos consenshi, ta pasa riba loke nos ta obliga pa haci. P’esey SEPPA ta condena y rechasa energicamente gobierno su intencion di pone un paro na e subsidionan di e fundacionnan.
“Ta di unda gobernantenan ta sali anto cu e “idea magico” aki pa awor pone un paro na subsidio di fundacionnan cu ta duna servicionan social na nos grandinan, na nos muchanan Vulnerable (grandi y chikito), na esnan incapacita??? Asina nos por menciona hopi mas!!”, asina e sindicato aki ta declara.
Segun SEPPA, ya caba problemanan ta serio!! Simplemente pa menciona algun, di cuido di nos muchanan chikito cu pa rason nan social ta wordo hala/kita for di mayornan. Tambe e hobennan cu igualmente no por keda bao custodia di nan mayornan. Igualmente e cuido di nos ancianonan y di nos mucha, hoben y hasta grandinan incapacita of cu necesidadnan special, hasta problemanan diferente y specifico bao di nos muchanan cu mester atencion diferente cu no ta solamente cuido. Tur esakinan ta ehempelnan di problemanan creciente den nos comunidad, segun SEPPA.
P’esey ta resulta incomprendibel y no admisibel pa SEPPA cu awor e gobernantenan ta scoge e momento akinan pa trece cambio of ta netamente pa libra nan mes di enfrenta e tipo di situacion grave aki cu mester di atencion, solucion efectivo??.
Sindicato SEPPA ta indica cu e problemanan social na Aruba ta grave y sin papia mes di e sistema di salubridad di cual tur hende ta keha di dje. Y nos kier core pa esakinan???
