Ayera, comunidad local a keda conmociona pa e lamentable noticia di e di cuatro victima den trafico, Altair Jaques Brelaz, naci na Brazil di 54 aña di edad y bibando na Aruba. Algo cu a causa hopi consternacion, ofensa y critica, tabata e escogencia di algun medio local pa publica video y potret di e fayecido mientras e tabata benta riba suelo, cu su carson abao.
Kico ta e balor noticiero di imagennan asina? Specialmente si considera cu na e momentonan ey, autoridadnan ainda tabata buscando contacto cu familiarnan di e victima pa confirma su identidad. De hecho, for di punto di bista di etica y decencia, por considera cu comunidad local y e audiencia di e medionan en cuestion a sufri un daño moral a causa di e imagennan ey.
Den e articulo “Covering the dead”, den Volumen 15 di Journalism Studies, Tal Morse ta explora e punto di encuentro di periodismo fotografico y morto, y ta mapa e tensionnan involucra.
Segun Morse, e ocurencia di morto ta cumpli cu un cantidad di criteria y balor noticiero, ya cu usualmente ta inespera, ta kibra e orden regular, tin significancia social y ta genera respuesta di un cantidad di institucionnan social. Ademas, pasobra eventonan di morto usualmente ta negativo, nan probabilidad di keda reporta ta halto—cu hopi biaha, noticia di morto ta e articulo lider den noticia. Claro, no tur morto ta sali den noticia, pero e morto hopi biaha violento di ciudadanonan priva ta parti di nos dieet diario di noticia.
Imagen di e morto ta aumenta e probabilidad cu lo reporta e evento, ya cu e documentacion aki ta duna publico un bista di un “teatro di violencia” emocionante y voyeuristico, segun Morse ta nota. Sinembargo, e documentacion visual di morto hopi biaha ta controversial.
Maske potret ta yuda nos compronde miho e mundo den cual nos ta biba, y periodistanan hopi biaha ta balora e habilidad di potret pa pinta realidad den un manera autentico, e poder di imagen visual por bira negativo ora ta trata di morto, ya cu morto, en gran parti ta keda un taboo, y su apariencia publico ta un tema sensitivo cu hopi aspecto cultural. A diferencia di otro topico di cual nan representacion visual ta haci’e mas facil pa aborda, ora ta trata di imagen visual di morto—specialmente morto violento—hopi biaha ta experimenta como abrumante y perturbador. Pa e motibo aki, mira representacion di morto ta preferible solamente den cierto circunstancia, y mas frecuentemente, ta reemplasa imagen di morto cu representacionnan mitiga. Esaki ta e paradox di morto den noticia—morto ta un topico lider den noticia, pero su muestra real ta poco.
Ki informacion ta necesario pa publico sa tocante morto violento, Morse ta cuestiona. Mas specificamente, kico ta necesario pa publico mira? Un presentacion publico di potret di un ciudadano priva sin nan permiso por viola nan privacidad y asina viola nan dignidad, specialmente si e imagen ta mustra e persona den un manera deshonrante. Por considera e imagen di e fayecido cu parti di su curpa sunu como un caso asina?
Morse ta continua splicando cu e balor noticiero di un morto ta den conflicto cu e balornan di dignidad humano y privacidad, ya cu e reportahenan ta expone ciudadanonan priva den nan momentonan mas dificil. E hecho cu un morto violento a tuma lugar den publico no ta suficiente base pa viola e dignidad humano di e victima. Igualmente, si un persona tin e mal suerte di muri den publico, no mester suprimi su derecho pa privacidad door di e derecho di publico pa sa. E dificultad, pues, di cubri eventonan di morto violento ta bin door di e imagen visual y no tanto di e informacion factual di e evento. Den e caso aki mester considera no solamente e violacion di e dignidad di e victima, sino tambe e sentimento di su familiarnan. Den hopi respecto, e familiarnan di e fayecido ta carga su derecho pa privacidad y dignidad humano, ya cu e victima ya ta morto. Nan ta forma un circulo secundario di persona cu por ta ofendi pa e circulacion di imagennan grafico.
Otro consideracion cu Morse ta menciona relaciona cu e visibilidad di morto ta e sentimento di e publico en general. Esaki ta e audiencia y lectornan cu por keda perturba pa e exposicion na imagennan horibel. Noticieronan mester tene cuenta cu cosnan asina por ta di mal gusto y respeta e sentimento di nan audiencia.
Ademas, noticia ta drenta casi tur hogar den nos comunidad. Publico tin control si ta mira of no ta mira noticia, pero no tin control riba ki noticia ta ricibi. Publico por haya imagennan horibel di morto violento ofensivo of inapropia, specialmente si ta expone mucha na e noticia of si ta consumi e noticia durante desayuno of cena. Periodista ta keda e principal “gatekeeper”—esun na control—di con ta bay presenta e noticia na e publico.
Teniendo cuenta cu e consideracionnan aki, mester conclui cu e derecho pa publico sa di un suceso no ta suficiente pa viola e dignidad humano y derecho di privacidad di un victima—den e caso aki, un fayecido den trafico—su familiarnan, sernan keri y publico en general. Un di e noticieronan cu a publica video y potret di e fayecido di un manera deshonorable mester a elimina esaki despues di a ricibi critica pisa di pueblo, confirmando asina e daño moral cu a causa cu su publicacion original. Sinembargo, e hecho cu tin periodista cu no tin sentido di respet pa decencia, moral y dignidad humano, sino cu mester warda pa critica drenta pa compronde cu comunidad no kier mira imagennan asina, no kier pa falta respeta asina na un fayecido, y no ta haya decente ni mucho menos necesario pa inclui imagennan visual asina den nan reportahe, ta algo hopi lamentable.
