Fundacion Salud Mental Aruba (Respaldo) lo tene e evento “Let’s Art about Mental Health” diasabra 23 di october na Atelier 89. Srta. Krital Browne y Srta. Thixianne Wever, di Respaldo, a elabora ariba kico e evento ta encera, ki por spera y tambe kico ta e meta di Respaldo cu e evento aki. 

Srta. Browne a splica cu e actividad aki ta un colaboracion  cu diferente stakeholders y tambe algun stakeholders ariba e tereno di cuido di salud mental y adiccion, y e meta di e actividad aki ta pa promove conscientisacion ariba topiconan relaciona cu salud mental y adiccion.

Ariba diasabra e evento lo cuminsa pa 10or di mainta, te cu 3or di atardi, cu entrada completamente gratis y el lo ta un actividad pa mucha, hoben y adulto. Srta. Browne a indica tambe cu lo bay tin varios tayer y charlanan educativo y informativo.

Prome cu portanan habri oficialmente pa publico, lo tin un tayer di terapia di arte (art therapie). E tayer aki lo wordo guia pa Sra. Marleen de Valk di Corsou, ken a haci estudio di Vaktherapeut/ Beeldend Therapeut. Cuponan pa e tayer aki ta limita na mas o menos 70 pa 72 participante. E tayer di art therapie tin un costo di 15 florin y ticketnan ta obtenibel na oficina di Respaldo y tambe na e Citgo Boulevard y Citgo Essoville.

Durante e sesion di vaktherapeut, Srta. Browne  splica, e grupo di 72 persona lo crea un piesa di arte unda cu nan lo por expresa nan emocionnan, nan pensamento nan , nan creatividad y na final di e session aki nan lo pone tur e 72 piesanan di arte hunto y nan lo forma un solo piesa di arte grandi.E materialnan cu lo wordo usa pa e tayer di art therpaie aki ta un carton grandi cu e vaktherapeut lo parti den e pidanan y lo tin stiftnan cu e participantenan lo usa.

Srta. Wever a elabora un poco ariba ki tipo di actividad lo tin durante e evento diasabra. Segun el a splica cuminsando pa 10or lo tin diferente actividadnan, entre otro e fundacionnan y stakehodlers cu lo tin mesanan di informacion pa duna tur informacion cu tin mester  ariba e parti di cuido di salud mental  adiccion.

Fuera di esey, Srta. Wever a indica, lo tin diferente presentacionnan y charlanan cortico ariba e topico di salud mental. E cantidad di participantenan pa cada charla of tayer ta maximo 12 persona. Lo tin tambe un kids corner cu diferente actividadnan recreativo pa e muchanan y tambe lo bay tin e art market unda cu diferente artista- y artesanonan local lo demostra nan arte.

Srta. Browne a splica tambe cu e placa cu wordo recolecta durante e evento aki lo bay pa un di e fundacionnan cu lo participa den un competencia ariba Facebook. “Pa medio di diferente stakehodlers, organisacionnan cu a duna un contribucion pa haci e evento aki posibel, nos a logra cumpra e material di arte pa varios organisacion participa na un competencia di arte”, el a bisa. “Pronto riba nos Facebook page nos lo expone na e pueblo di Aruba e diferente piesanan di arte cu e fundacionnan a traha, pueblo di Aruba por bishita e Facebook page, like e piesanan di arte di e fundacionnan y e fundacion cu mas likes lo ricibi un premio cash”.

Arte ta un forma di terapia cu ta creciendo mas y mas entre personanan cu tin problema den e tereno di salud mental y adiccion. E ta un manera pa expresa emocionnan, procesa emocionnan y experiencianan. “Nos ta pensa cu esaki ta un bunita manera pa e pueblo di Aruba cera conoci cu e forma di terapia aki y tambe pa nan experiencia, expresa nan emocionnan na diferente manera pasobra mayoria biaha bo ta sinti algo pero e ta dificil pa bo comunica y pa medio di arte ta un bunita manera pa exprese y sake di bo curpa”, Srta. Browne a bisa.

Dia 10 di october tabata e Dia Mundial di Salud Mental. Srta Brown ta splica cu en conexion cu esaki tambe, e evento di “Let’s Art about Mental Health” ta un menra di concientisa hopi hende mas den comunidad aria e topico aki, cu hopi ainda ta mira cu un tabu. “En berdad e topiconan di salud mental of cuido di salud mental ta un tabu, mayoria hende tin toch e berguensa di papia erover”, el a bisa. “Hopi biaha hende door di e berguensa nan ta sinti nan mes nan so cu nan no por expresa y mi ta kere cu por medio di un evento asina toch bo ta ripara cu bo no ta bo so, y esaki ta e informacion cu tin disponibel”.

Si nos bay bek, dia 10 di october tabata e World Mental Health Day y e tema di e aña aki ta Mental Health in an Unequal World pasobra nos sa cu pa un persona yega na cuido di salud mental  no ta facil dependiendo e pais unda cu e ta biba aden y pesey nos a pensa pa bin cu un evento asina, “Let’s Art about Mental Health” pasobra arte toch ta un forma accesibel cu lo por wordo uza door di varios hende”, el a agrega.