Respaldo ta acerca na su clientenan unda cu nan ta

Fundacion Respado a habri su portanan oficial na localidad nobo mas central pa comunidad di Aruba. Esaki lo ta situa na Mahuma 54, un localidad mas central y cu mas accesibilidad pa pueblo.

Relacionista publico Jerianne Tiel a expresa cu ta contento pa e gran opening di nan localidad nobo na Oranjestad. Na 2017 Respaldo a keda encarga cu e Fact-team cu ta e parti di proyecto di policlinica na Playa caminda nan lo ta mas accesibel compara cu antes cu e localidad ta keda na ex PAAZ.

E localidad aki ta cu a ta keda na ex edificio di Afac, ora ta sali di e rotonde afo, ta coy e caminda di Mahuma cu ta sigui pa e T-weg di Simon Antonio patras.

Nan ta haci policlinica pa adulto, mucha y hoben cu tabata ubica na Caya J. M. Arends y awo tambe a ubica e Fact-team den un caminda central na Aruba, caminda hende por acerca mas lihe cu cualkier necesidad ora nan tin mester di servicio aki.

Manera ta conoci cu for varios luna minister encarga cu Salubridad, Dangui Oduber a splica cu pa medio di Social Crisis Plan – di ministro di Labor y Asunto Social, Glenbert Croes – a pone un fondo disponibel pa bin cu team cu ta consisti di psikiatria, psicologo, enfermeronan cu ta duna yudansa.

E Fact Team lo subi riba caya pa asina papia cu adicto, di un manera gana nan confiansa pa asina e adicto di forma boluntario por presenta na FMAA na Seroe Colorando (sin obligacion) pa por haya e ayudo necesario.

Hunto cu e Fact Team lo bin cu maneho cu ‘ta premira cu lo ta exitoso’ pa asina atende cu problema cu adicto ambulante. Pa finalisa el a bisa cu e team ta esencial pa esaki y institui aña pasa y cu tur cos ta na luga pa cuminsa haci e trabou riba caya y brinda e cuido ambulante cu ta necesario pa atende cu e problema aki.

Pa no tin confusion, e localidad di Noord lo keda habri y den servicio. E edificio di ex PAAZ ta pa pashent cu mester keda drumi of un temporada mas largo den e clinica. Nan tin nan dokter specialisa (psicologo, psikiatra) cu ta pendiente y atende den e policlinica.

E proceso pa yega e policlinica ta cu mester tin un verwijsbrief di AZV cu su dokter di cas a dun’e. Cu e carta ta yega na e clinica sea e edificio di Noord of e localidad nobo na Mahuma. Tambe cu esey, Tiel ta splica cu nan lo studia e caso un biaha pa siman.

Asina nan por wak cua caso ta bay cu e specialista cu nan ta haya ta necesario pa ofrece e yudansa. No ta importante si nan yega e edificio bieu of nobo, si ta un pashent cu mester keda den edificio, e ora mester ta via dokter pa indica esaki, specialista of EHBO.

Nan a scoge e localidad di Mahuma, mirando cu ta un area mas central pa Aruba di tur banda. Tiel ta splica cu na 2017 a ripara cu falta di area di cuido di salud Aruba, y esey ta e motibo cu a bin cu e cambionan aki.

Ta necesario e yudansa den cuido psikiatrico, anto mester expande e servicio. “Un metodo cu nos kier introduci ta e Fact methodiek. Esey ta nifica cu no solamente ta bay atende e persona den e clinica, pero lo atende e persona den nan mesun ambiente”, e ta splica.

Un servicio mas amplio, pa e motibo aki tambe nan scoge e localidad di Mahuma, pasobra no solamente e luga ta central na Playa y riba e high way pero tambe e ta patras, caminda persona tin nan privacidad ora cu yega na e policlinica.

E plan ta pa despues por habri un localidad na San Nicolas ‘pero esey ta e siguiente fase’. Ta trece un organisacion y un sistema di maneho mas amplio. Nan ta bisa cu nan lo keda conscientisa pa hende por compronde di trempan cu tin algun cos, manera depresion, pa cual por acerca un psikiatria.

Ta conoci cu hende ta wanta y no ta acerca un specialista, pues Respaldo ta keda bringa pa haci nan cliente reconoce cu nan por yega pa nan por haya e servicio.

A puntra Tiel pa ki edad nan ta cuminsa duna servicio caba. El a contesta cu nan ta bezig cu proyecto pa cuminsa desde e bariga di e mama. Unabes tin señal cu un persona cu ta na estado tin problema of situacionnan grave, nan no mester warda pa e mucha nace y sufri pasobra ya na e momento ey ta laat.

Sinembargo e ta bisa cu si tambe ripara por acerca prome cu e baby nace y nan ta duna servicio. Pero ya Fundacion Respaldo ta dirigi su mes na mucha di 4 pa 5 aña caba.