“Geweldloos Verzet” ta un metodo pa yuda famianan enfrenta comportacion dificil di muchanan.

“Geweldloos Verzet” ta un metodo desaroya pa Haim Omer di Israel cu ta yuda mayornan maneha e comportacion dificil di nan yiunan, duna mas forsa y confiansa y reduci e sentimento di impotencia. E metodo ta basa riba un combinacion di “verbindend gezag”, cu ta enfoca riba mantene conexion y contacto positivo cu e yui, mientras ta pone un limite fiho contra comportacion inaceptabel.

Na Aruba, un curso intensivo a ser duna na e profesionalnan di Respaldo pa domina e tecnica aki. E docentenan, Drs. Elian Wiebenda y Dr. Hans Bom, cu ta psicologo clinico (klinisch psycholoog) y terapeuta di sistema (systeemtherapeut) cu mas di 17 aña di experiencia na Lorentzhuis, un centro di terapia na Hulanda, a yega pa trece nan conocemento y experiencia na e team di Policlinica di mucha y hoben na Respaldo Aruba.

Segun e docentenan, un gran enfasis a ser poni riba e actitud di e profesional na momento di duna e terapia. Un intervencion ta bira mas valioso ora e ta ser aplica cu e actitud corecto. E curso a inclui diferente tayer y practica, caminda e cursistanan a mustra hopi interes y un deseo fuerte pa siña algo nobo.

Pa e docentenan e curso tabata un exito na momento cu e cursistanan a indica cu nan a descubri e “poder di silencio” – un herment poderoso cu por yuda na crea cambio sin hopi palabra. Normalmente e profesional lo a purba di papia hopi cu e cliente, pero cu e metodo aki ta wordo uza menos palabra posibel. E docentenan ta spera cu e profesionalnan di Respaldo por aplica esaki den nan trabou cu famianan, pa duna nan hermentnan necesario cu nan mester pa yuda nan famianan.

E curso a bira posibel danki na e contacto di Dr. Ushi Moreta, psikiatra di mucha y hoben na Respaldo, cu a cera conoci cu e metodo aki na Lorentzhuis y a invita e docentenan pa trece e metodo na Aruba pa un grupo mas grandi.

E curso ta un paso importante pa duna profesionalnan di Respaldo e hermentnan pa duna mayornan na Aruba un manera mas fuerte y efectivo pa maneha situacionnan dificil cu nan yiunan.

Respaldo kier invita comunidad pa keda sigui nan riba nan rednan social cual ta Facebook, LinkedIn y Youtube pa mas informacion