Resolucionnan di aña nobo: Efectivo of inutil?

E termino resolucion di aña nobo (new year’s resolution) ta uno hopi usa cu por wordo describi como un promesa of un decision firme tuma ariba dia di bispo di aña nobo of ariba dia di aña nobo mes pa haci of abstene di haci algo durante e aña nobo.

Algun di resolucionnan di aña nobo mas comun ta referi na superacion personal cu ta inclui biba mas saludabel, ta mas feliz, haci mas ehercicio, reduci consumo di alcohol, stop di huma y un di esunnan mas popular ta pa baha peso.

Segun un articulo publica ariba BBC online, Anna Katharina Schaffner, historiador cultural y autor di e buki The Art of Self-Improvement, ta splica cu ta dificil pa bisa cu exactitud ki tempo a tradicion di resolucionnan di aña nobo a keda estableci pa prome biaha. Schaffner ta señala cu referencianan literario di superacion personal ta bay back algun siglo. E practica di vincula metanan cu un fecha determina tabata estableci caba durante e decada 1860.

Informacion di un encuesta reciente di YouGov publica den e mesun articulo, ta indica cu 35% di personanan cu a haci resolucionnan di aña nobo a logra cumpli tur nan metanan, y 50% di personanan a logra mantene algun di nan resolucionnan.

Schaffner ta señala den e articulo tambe cu den su opinion e no ta un coincidencia cu hopi hende ta interesa pa haci cambionan positivo despues di un temporada di fiesta. E ta bisa cu ta notable cu hopi resolucion ta centra alrededor di abstinencia, bandona e mal habitonan, pa haci curpa y alma limpi.

Den un entrevista cu Dietiesta di Alimenta Diatetics & Health Promotion, Srta. Charlene Leslie, unda cu el a duna algun tips pa keda saludabel durante dianan di fiesta, Srta. Leslie ta menciona cu en realidad resolucionnan di aña nobo pa baha peso of ta mas saludabel ta mas comun di loke nos ta pensa aki na Aruba.

El a splica cu tin dos manera di pensa ora cu ta trata di e topico aki. E prome ta ora cu e persona ta pensa cu e ta haci e resolucion na comienso di aña y ta bay haci esaki hopi estricto pa logra e meta. Y di otro banda tin e persona cu ta pensa cu nan a purba varios biaha na comienso di aña pa mantene nan resolucion y no a logra nan meta y na final ta give up.

Pa e motibo ey Leslie mes ta bisa pakico warda te januari, te momento cu un aña nobo ta cuminsa pa cambia pa un estilo di bida saludabel. “Pakico bo no por haciele awe mes of mañan? E mas importante ta cualkier cos cu bo haci, si ta awe of si ta na januari of na februari, ki tempo cu bo kier haciele, wak pa nan ta cambionan chikito y sostenibel”, el a indica.

Aunke e resolucion di aña nobo pa cuminsa un estilo di bida mas saludabel of pa baha peso ta hopi popular, na Aruba e cifranan di sobrepeso y obesidad den poblacion ta un problema preocupante. Leslie a splica cu e cifra aki ta casi na 80% di e poblacion y esey ta un cantidad hopi halto. E ta splica cu aunke tin hopi mas hende ta bira consciente, hopi mas hende ta bira activo, hopi mas ta cuminsa pensa ariba kico nan ta come of ki ora, locual ta preocupante ta cu tin dos extremo.

“Tin e persona cu ta hopi activo casi tur dia, cu ta come hopi saludabel y esey ta hopi great. Pero den e otro extremo bo ta haya cu juist nan no ta come saludabel, nan ta come hopi riba caya, porta hopi uso di bebidanan alcoholico y no ta move hopi”, el a señala.

P’esey en realidad un resolucion estricto na comienso di aña hopi biaha no ta e concepto ideal pa baha di peso of haci e transicion pa un bida saludabel. Leslie a señala cu e parti importante ta pa encontra un punto memey, unda cu e alimentacion saludabel ta normal, cu tin movecion regularmente sin pone tanto presion, unda cu un alimentacion y un estilo di bida saludabel ta normal. “Esey ta unda nos mester bay traha riba dje y haci stapnan chikito tur dia pa tin un estilo di bida mas saludabel”, el a bisa.