Residentenan Hulanda ta preocupa pa nan posicion financiero

(NLTimes)—E cantidad di residente Hulandes cu ta preocupa pa nan futuro financiero a aumenta significadamente aña pasa. Na 2022, 29% di adulto tabatin preocupacion cu placa, compara cu 23% na 2021, segun CBS Hulandes a reporta. Esey tabata e prome aumento desde cu CBS a cuminsa colecta e data aki na 2013.

En particular, hobennan y mayornan soltero tabata hopi preocupa tocante nan futuro financiero. Segun CBS, esey ta pasobra preocupacion pa placa usualmente ta reduci cu edad y mientras salario di hende ta cuminsa aumenta—dos factor cu usualmente tin conexion cu otro.

Aña pasa, 36% di hobennan di 18-25 aña tabata hopi preocupa pa nan futuro financiero. E porcentahe a reduci cu cada grupo di edad cu a bin despues pa 23% entre hendenan di mas cu 75 aña di edad, ken tabata e grupo menos preocupa pa nan finanzas.

CBS tambe a puntra respondientenan con satisfecho nan tabata den nan situacion financiero actual. E satisfaccion ey tambe a aumenta cu edad, for di 71% entre hobennan di 18 pa 25 aña, pa 86% entre adultonan mayor. “Den averahe, homber y muhe ta igualmente satisfecho cu nan situacion financiero actual. Pero mas muhe cu homber ta preocupa tocante nan futuro financiero,” CBS a nota.

Aña pasa, mayornan soltero tabata mas preocupa tocante nan finanzas den futuro compara cu hendenan soltero sin yiu; mas cu 40% contra 30%. “Hasta ora bo considera e diferencianan den edad y salario entre e dos gruponan aki, mayornan soltero toch tin mas chens di preocupa compara cu hendenan soltero sin yiu,” CBS a bisa.

Entre parehanan, ambos sin y cu yiu, 26% tabata hopi preocupa tocante nan finanzas den futuro aña pasa. Sinembargo, ora diferencianan den edad y salario entre e dos gruponan aki ta den consideracion, adultonan cu un partner y yiu tin menos chens di preocupa compara cu e grupo sin yiu.”

Tambe propietarionan tabatin menos chens di mira un futuro financiero menos agradabel compara cu huurdo. Casi un kwart di propietarionan tabata hopi preocupa aña pasa, compara cu 41% di huurdo ken ta ricibi huurtoeslag y 36% di huurdo cu no ta haya e toeslag aki.