(AP) – Algun residentenan di Lahaina a bolbe back nan propiedadnan debasta dialuna pa prome biaha desde cu e ciudad di Hawaii a ser destrui pa candela casi 7 siman atras.
E prospecto di bolbe a causa emocionnan fuerte den e residentenan cu mester a bandona nan casnan den auto of na pia mientras cu candelanan tabata consumi Lahaina, e capital historico di e ex reino di Hawaii. E candela cu a tuma luga dia 8 di augustus a causa e fayecimento di 92 persona y a destrui mas di 2,000 edificio, mayoria di nan casnan. Algun di e sobrevivientenan a bula den awa y a busca refugio den olanan mientras cu huma scur tabata blokia e solo.
Oficialnan a urgi e residentenan bolbiendo back e area pa no busca door di e restonan pa asina no lanta stof toxico. E prome area cu a ser duna e ‘ok’ pa bolbe drenta ta e zona pa noord di Lahaina. E residentenan por a bolbe back pa bishitanan supervisa entre 8or di mainta te 4or di atardi riba dialuna y diamars.
For di blokia di Guardia Nacional cerca di e zona, Jes Claydon por a mira e ruina di e cas unda el a biba pa 13 aña y a cria 3 yiunan. Tiki resto por a ser reconoci ademas di e pochinan di ‘sea glass’ cu tabatin dilanti e porta. Claydon tabatin spera di por coelcta e pochinan aki y cualkier memoria cu e por a haya, “mi kier e libertad di por ta ey y absorbe loke a pasa,” el a comenta. “Cualkier cos cu mi por haya, aunke ta djis e pochinan ey, mi kier bay cune.. e ta un parti di cas.”
E personanan cu a bolbe back a ricibi awa, stacion pa laba, w.c portatil, cuido medico y di salud mental ademas di transportacion si necesario. Gruponan di boluntarionan tambe a ofrece ekipo di proteccion personal, incluyendo tapaboca. Oficialnan a adverti cu e restonan por contene asbestos, jood y otro toxinanan.
