Wardacosta Caribe Hulandes diamars atardi a ricibi un notificacion di un compania di watersport den area di Eagle Beach, indicando cu tin dos turista perdi riba lama.
E compania di watersport mes a bay busca e dos turista riba lama y a encontra un waverunner, pero no tabatin ningun persona ariba. Mesora e Centro di Operacionnan (MOC) di Wardacosta a dirigi e helicopter y un Metal Shark pa busca e dos turista riba lama.
Durante e buskeda a bin encontra e otro waverunner 3 miya for di costa di Hadicurari, cu un hende homber so ariba dje. Ya na e momento ey solo a baha, locual a cuminsa dificulta e buskeda pa e di dos persona.
Dado momento e helicopter a mira un hende homber den lama na mas o menos 2.7 miya for di costa y MOC a dirigi e Metal Shark pa bay saca e homber for di lama. Esaki a resulta di ta e otro turista hende homber cu tabata perdi.
Ora a saca e homber for di awa, e homber aki a indica cu e no tabata sinti su curpa bon. Mesora e
helicopter di Wardacosta a bin busca e homber riba e Metal Shark pa hiba e homber aki aeropuerto, caminda un ambulance tabata warda riba dje pa hib’e hospital.
Wardacosta ta desea e persona pronto recuperacion.
