(AP) — Republicanonan ayera a tuma e prome stap pa acusa Hunter Biden di desacato di Congreso pa desafia un citacion congresional. Nan a avansa e acusacion na un voto completo di Congreso algun ora despues cu yiu homber di presidente Mericano a genera un delirio politico momentaneo na momento cu el a aparece den prome rij pa parti di debate.
Comitenan di Supervision y Hudiciario di Congreso cada un a pasa cargonan di desacato contra Hunter Biden, cu sosten unanime Republicano y oposicion di tur Democrata. E accion ta set up un voto den Congreso riba recomendacion di cargo criminal contra un miembro di famia di presidente Joe Biden mientras partido Republicano ta move den e etapanan final di un investigacion di impeachment riba e propio presidente.
Si Congreso vota pa tene Hunter Biden den desacato, e ta bay keda pa Departamento di Husticia, specificamente fiscal pa Districto di Columbia, pa dicidi si ta procede.
Esaki ta e stap mas recien den e investigacion cu a cuminsa na september, pero cu te ainda no a descubri evidencia directamente implicando e presidente den actonan incorecto involucrando dealnan comercial di su yiu homber.
Hunter Biden a defende su falta di cumplimento cu e citacion Republicano, cu a dun’e orden pa presenta pa testimonio tras porta cera na mita di december. Biden y su abogadonan a bisa cu informacion di entrevistanan priva por leak selectivamente y keda manipula pa Republicanonan den Congreso y a insisti cu e lo testigua solamente den publico.
Yegada di Hunter Biden na e Comite di Supervision, cu ta ocupa cu un investigacion di un aña, sintando den e audiencia cu su team legal, incluyendo abogado Abbe Lowell, a pone e panel den caos.
Nancy Mace, un Republicano di South Carolina, a insisti cu mester aresta Hunter Biden rapidamente. Marjorie Taylor Greene di Georgia a yama Biden cobarde mientras el a bay durante su comentarionan. Legisladornan Democrata a argumenta cu mester permiti Biden pa papia publicamente.
Hunter Biden y su abogadonan a bandona e comite tiki despues, dunando declaracionnan breve na reporteronan pafo. Lowell a reitera cu, a diferencia di e presidente, su cliente “tabata y ta un ciudadano priva.”
“A pesar di esaki, Republicanonan a busca pa us’e como un substituto pa ataca su tata,” el a bisa.
E unico comentarionan di Hunter Biden pa reporteronan tabata ora a puntra pakico e tabatin su tata riba speaker phone durante varios di su reunionnan di negoshi. “Si e yam’e, bo lo contesta telefon?” el a contesta.
Si e referencia di desacato contra Hunter Biden pasa e Congreso, e lo ta ainda otro reto pa fiscalnan federal ya bao scrutinio pisa pa nan maneho di cargonan contra Biden relaciona cu su impuesto y uso di arma. Si nan no haci nada cu e cargonan di desacato di Congreso, e lo duna impulso probablemente na critica conservador cu e Departamento di Husticia ta politica – specialmente mirando cu dos consehero anterior di presidente Donald Trump a keda enhuicia pa desacato di Congreso door di administracion di Biden.
