(AP) — Republicanonan den Congreso Mericano ta advertiendo Hunter Biden cu nan ta bay move pa proces’e pa desacato di Congreso (minachtingsprocedure) si e no presenta e luna aki pa un interogacion tras porta cera, aumentando e riesgo den e disputa aumentando tocante testimonio di yiu di presidente Joe Biden.
Hunter Biden a insisti cu e ta bay testigua na Congreso solamente si e ta publico. Pero den un carta manda na su abogado ayera, Republicanonan top a bis’e cu nan citacion pa un interogacion tras porta cera dia 13 di december no ta negociable.
“Contrario na e declaracionnan den bo carta, no tin ‘escogencia’ pa Sr. Biden haci,” Rep. James Comer, R-KY., kende ta presidente di Comite di Supervision di Congreso, y Rep. Jim Jordan, R-Ohio, presidente di Comite Hudiciario, a bisa.
Comer y Jordan a agrega cu busca un sesion priva prome cu un audiencia publico ta un maneho cu ambos partido historicamente a usa na momento di interoga testigo.
Hunter Biden a bisa Republicanonan cu e no ta bay testigua tras porta cera pasobra informacion di e entrevistanan aki por leak selectivamente y ser usa pa “manipula, hasta distorsiona e hechonan y malinforma e publico Mericano.”
E respuesta na e comite tabata den linea cu un maneho mas fuerte cu e team legal di Huntr Biden a tuma den lunanan recien mientras Republicanonan den Congreso ta busca un investigacion di impeachment buscando pa vincula su tata na su tratonan di negoshi.
Presidente Biden ayera a rechasa como “mentira” e acusacionnan cu el a comporta ilegalmente of sin etica relaciona cu e tratonan di negoshi di su yiu. A haci e pregunta despues cu e presidente a duna comentario tocante financia e esfuerso di guera na Ucrania y ta yega despues cu encuesta di Associated Press-NORC Center for Public Affairs a haya cu mayoria di adulto na Merca ta kere cu e presidente a actua ilegalmente of sin etica pa cu su yiu.
Republicanonan te awo no a logra haya evidencia implicando e presidente directamente den algun comportacion robes. Pero a bin duda tocante e etica rond di negoshinan internacional di famia Biden y legisladornan ta insisti cu nan evidencia ta pinta un imagen perturbante di “traficacion di influencia” den e tratonan di negoshi di e famia, particularmente cu cliente den exterior.
