(NLTimes)—E movemento antimonarkia, Republiek, a organisa un manifestacion na Emmen riba Dia di Rey yamando pa reduccion di salario di e monarca, y bisando cu e mester paga impuesto manera tur otro hende. Nan ta pensa cu Rey Willem-Alexander mester ta solamente permiti pa gana e suma maximo cu por paga sirbidonan publico na Hulanda, un standard nombra pa ex-prome minister Jan Peter Balenende.
En bes di 1.1 miyon euro anualmente pa e rey, e mester gana no mas cu aproximadamente 233,000 euro pa aña, e nivel actual di e Standard Balenende, segun e republicanonan a bisa. E movemento a lansa un peticion di campaña pa cuminsa diasabra.
“E gran mayoria di hende Hulandes no gusta cu e Oranjes ta hayando un salario di miyones euro,” segun presidente di Republiek Floris Müller. Ademas di su salario di 1.1 miyon euro, Rey Willem-Alexander ta ricibi casi 6 miyon euro den onkostenvergoeding.
“Den un tempo ora hopi hende ta pasando dificil, ta inexplicabel cu nos ta paga e hefe di estado asina hopi placa, e no ta husto y un simbolo di desigualdad social,” Müller a bisa. E famia Oranje, e miembronan di e Famia Real Hulandes, ta entre e famianan mas rico den Europa.
Republiek a publica un borchi den e ruta unda e Famia Real a cana durante nan bishita na Emmen diasabra. E borchi a mustra e status actual di e cantidad di firma cu nan a colecta. “Un manifestacion interactivo,” Müller a yama e accion, unda hende tambe por a firma durante e evento.
