A pesar cu regimen di Nicolás Maduro ta sigui sigura cu na Venezuela ta existi e miho sistema electoral di mundo, democracia y libertad pleno, mas vocero internacional ta afirma cu den e pais aki en realidad ta un dictadura ta reina. Y mas ainda despues di e eleccion di diadomingo pasa, den cual segun Conseho electoral, e partido Chavista a gana 18 gobernacion, contra cinco di oposicion.
Un di e voceronan aki ta Mario Díaz-Balart, congresista federal republicano pa e districto 25 di estado di Florida, cu ta considera cu cualkier votacion bao gobierno di Maduro no lo ta ni transparente ni berdadero, asina ta cu e ta haya cu ta necesario sigui presiona Chavismo a traves di sancion. Den combersacion telefonico cu El Nacional Web, e politico di origen Cubano a bisa cu mester busca metodo pa yuda oposicion Venezolano, victima di persecucion y a menasa.
“Esey ta basicamente e politica cu presidente Reagan a autorisa pa destrui Union Sovietico. Presiona e regimen economica y diplomaticamente, y na mesun momento yuda e sociedad civil, e oposicion interno,” e congresista a splica, cu no Tin problema pa cualifica gobierno Venezolano como “regimen narcoterorista y dictatorial.”
Algun analista a señala cu e sancionnan no lo haci daño na e regimen na Venezuela: nan ta duna ehemplo di paisnan manera Cuba y Corea del Norte, cu a pesar di varios medida di presion ta sigui bao di gobiernonan dictatorial. Sin embargo, Díaz-Balart a indica cu e decisionnan si ta afectando e gobierno, ya cu a influencia otro pais pa considera aplica medidanan similar. Tal ta e caso di Canada, cu a sanciona Nicolás Maduro y 39 funcionario halto. Di su parti, Union Europeo a acorda pa prepara sancion pa motibo di e represion na Venezuela.
Entre e medidanan di Merca contra Nicolás Maduro tin e prohibicion di ehecuta transaccion cu documento di debe y accion emiti pa gobierno Venezolano y Pdvsa, como tambe e restriccion di intercambio cu cierto bono cu ta pertenece na sector publico Venezolano y e pago di dividendo na e regimen. Segun Diaz-Balart, e proximo paso mester ta relaciona cu petroleo: “Mi ta apoya y ta kere cu e decision di gobierno di Trump ta sigui paso pa paso, incrementando presion, incluyendo por ehemplo cu nan no por yega mas na fondonan internacional pa busca credito. Mi ta kere cu e proximo sancion grandi mester ta e cuestion di petroleo. E fondonan ey di crudo no ta yega na pueblo Venezolano. E regimen ta uza nan pa enrikece nan mes y tambe pa reprimi pueblo Venezolano.”
Aunke e ta aplaudi cu gobierno di Trump ta evalua tur alternativa pa recupera democracia na Venezuela, el a indica cu “obviamente e opcion militar no ta viable”: na augustus tabatin preocupacion den comunidad internacional ora presidente Mericano a bisa cu e no ta descarta un intervencion. El a insisti cu e miho caminda ta esun diplomatico.
