Republica Dominicana: Ta mira mercado interesante di turista discapacita

(DiarioLibre) – Autoridadnan di turismo na Republica Dominicana ta mustrando gran interes den mercado di turista cu algun discapacidad cu ta requeri cierto trato special. Na mundo lo tin alrededor di 1.000 miyon persona cu cierto discapacidad, un oportunidad grandi pa e pais desaroya “turismo accesible”.

“Solamente den mercado di Estadonan Uni, turismo accesible ta representa mas di 30.000 miyon dollar pa aña y esey ta den e mercado ey so. Di manera cu e mercado accesible na mundo ta sumamente grande,” Rafael Blanco, presidente di Asociacion Nacional di Hotel y Restaurant di Republica Dominicana (Asonahores), ta expresa.

E ta bisa cu turismo accesible tin tres segmento fundamental: persona cu un discapacidad permanente, persona cu un discapacidad temporal y tambe e adultonan mayor.

“Esaki ta un mercado hopi importante cu ta creciendo y un mercado cu nos mester mira di dos punto di vista: e ta financieramente sostenible, pero tambe di e punto di vista humano. Esaki ta cos cu mester haci pasobra e ta moralmente corecto y e ta algo cu nos definitivamente ta apoya,” el a splica.

Di su banda Diego Gonzalez, presidente di Red Iberoamericana de Turismo Accesible, a bisa cu e poblacion cu discapacidad na mundo ta cerca di 1.000 miyon persona. “No tur persona cu discapacidad ta biaha, pero si solamente 1 % di e personanan cu discapacidad biaha y yega na Republica Dominicana, nos ta papiando di miyones di persona,” Gonzalez a argumenta.

El a señala cu pa probecha e oportunidad ey, mester facilita acceso no na hotelnan solamente, sino den transporte, na e actividadnan recreativo, entre otro. “E ta un derecho, pero tambe un oportunidad di mercado pa Republica Dominicana,” Gonzalez a indica. El a splica cu e pais tin practicamente e alohamento regula pa loke ta accesibilidad, pero cu mester traha ainda riba transporte, unda un persona cu rolstoel mester por usa e servicio ey.

“Republica Dominicana ta na caminda pa converti su mes den un di e paisnan cu por garantizaa tur facilidad na persona cu discapacidad y mobilidad reduci,” Gonzalez a conclui.