Ayera den cuadro di conmemoracion di 174 aniversario di independencia di Republica Dominicana a bira un oportunidad special pa prome minister, Evelyn Wever-Croes (MEP), refleha den su discurso e relacion historico cu ta existi entre ambos pueblo.

Igualmente el a felicita e comunidad Dominicano na Aruba pa nan celebracion di independencia y gradici nan sacrificio di bandona nan hogar y famia y bin Aruba pa yuda nos desaroya nos economia.

Tambe den nomber di gobierno di Aruba a laga sa cu nan ta comprometi pa sigui fortalece e lasonan di fraternidad y cooperacion cu Republica Dominicana. Na Aruba ta existi un comunidad Dominicano estableci hopi aña pasa cu presencia di diferente generacion. “Hopi di nan a laga nan hogar y nan famia pa bin Aruba y bin yuda nos den e desaroyo economico di nos isla. Nan a haci di Aruba nan pais di residencia.”

E acto aki tambe tabata un oportunidad pa e mandatario local laga sa cu nos pais ta confronta retonan grandi riba tur tereno, pero nos no mester tin miedo pa confronta nan. “Nos pais a enfrenta retonan enorme den pasado. Mescos cu den pasado tambe e biaha aki mi tin e siguransa cu nos ta bay vence e retonan. Semper cu nos ta mantene uni.”

Reseña historico
Den e acto protocolario cu a tuma luga riba plaza, dedica na e heroe di independencia Dominicano, Juan Pablo Duarte, e mandatario Arubiano a bisa cu asina cu nan tin e plaza aki, e laso di amistad entre ambos pais tambe a keda demostra cu un caya cu ta carga e nomber di Betico Croes na Santo Domingo.

El a bisa cu ‘esaki ta un muestra tangibel di e respet y aprecio mutuo entre e lidernan di Aruba y e lidernan di Republica Dominicana’. Ambos echo tin un nificacion relevante cu ta estrecha e lasonan ainda mas entre Aruba y Republica Dominicana.

Premier Wever-Croes a sigui bisa cu Republica Dominicana como pais ruman ta ‘hopi liga historicamente cu nos isla di Aruba’. E area di lama Caribe, conoci pa e fluho intermigratorio, a bira e escenario di hopi pueblo cu den temporada determina a bandona nan propio isla pa busca un mayor y miho oportunidad. Esaki a produci un miho integracion entre e diferente islanan di Caribe.

El a referi cu e tempo aya hopi Rubiano a inmigra pa Republica Dominicana y Cuba entre 1870 y principio di siglo 20. “Esey tabata e epoca di e bonansa di sucu. Nan a bay traha den e cunucunan di e matanan di sucu.” Despues a surgi e bonansa di petroleo entre 1918 y 1985 cu a trece un fluho di inmigracion a contrario. Ya cu for di Republica Domincana a bin hendenan pa Aruba y Corsou pa traha den e refinerianan.

E mandatario ta haya cu e desaroyo bilateral aki tabata e momento husto pa establece relacionnan diplomatico entre ambos pais. El a trece e dato historico di dia 24 di januari 1946, e fecha aki a wordo acredita e prome consul di Republica Dominicana na Aruba, Alfonso Conde. El a haya su creditacion diplomatico for di gobierno di reino Hulandes den exilio na Londres.

Tambe den su panorama historico-social-economico entre ambos pais, e mandatario local a referi na e desaroyo turistico na Aruba cu a demanda man di obra riba tereno di construccion y tambe den dunamento di servicio den e hotelnan. Esaki a crea mas oportunidad di trabou, tanto local como regional.

E mandatario a bisa cu e reseña historico aki a demostra cu ta existi ‘un interesante dinamica’ entre e pueblonan di Republica Dominicana y Aruba. Paisnan comprometido entre nan mes cu den tempo determina tabata capaz y dispuesto pa coopera pa e bienestar di nan hendenan.