Ministro di Turismo di Republica Dominicana, David Collado, a anuncia cu entrante 1 di november, diadomingo venidero, lo kita e restriccionnan pa barconan crucero relaciona cu e pandemia di Covid-19.
E pandemia a causa e suspension di permiso pa atraca y desembarca di barco crucero na hafnan di Republica Dominicana, pa e menaza di propagacion di e virus. Collado a haci e anuncio durante un rueda di prensa den cual a participa tambe funcionario di e Autoridad Portuario Dominicano.
Durante e acto e ministro di Turismo a destaca e importancia di reinicio di e operacionnan pa e yegada di e cruceronan pa Republica Dominicana, cu aña pasa a aporta mas di 1,4 miyon bishitante.
E promer puertonan cu lo ta habilita pa ricibi barco crucero lo ta esun di Sans Souci na Santo Domingo, Amber Cove na Puerto Plata y haf di La Romana. Algun di nan tin te cu e fecha aki confirmacion pa ricibi te cu ocho linea di crucero.
Covid-19
Mientras tanto, e situacion di Covid-19 na e pais ta sigui dudoso. Republica Dominicana ta den categoria 3 di alerta di CDC Mericano, cual ta: evita tur biahe no esencial. Esaki ta inclui biahe cu crucero. Dia 29 di october ainda e pais tabata na un nivel di 19.735 caso activo, den un trayecto lento di recuperacion di un peak di mas di 35.000 caso activo na inicio di augustus.
