(DiarioLibre) – Desde casi 15 aña pasa Republica Dominicana ta tratando e tema di e expansion di gas natural. Na 2007, gobierno di presidente di e tempo ey, Leonel Fernandez, a trata durante varios aña pa transporte publico, encabeza pa Oficina Metropolitana di Servicio di Autobus (OMSA), usa e combustible.
Diahuebs pasa vice-ministro di Comercio Interno di ministerio di Industria, Comercio y di Empresa Mediano y Chikito, Ramon Perez Fermin, a bisa cu e institucion ey ta den un proceso di relanzamento y expansion di gas natural na e pais. El a indica cu e reinicio di promocion di uso di gas natural ta un tema cu nan ta bin ta desaroyando desde dos aña pasa.
El a observa cu, como cu tabatin un crisis cu e alza di prijs di gas natural na nivel internacional, suma na e conflicto arma entre Rusia y Ucrania, e combustible ey a keda afecta di dos manera. “Tur esaki, eventualmente, lo tuma su ritmo normal, y pesey nos ta sigui sin pausa desplegando tur nos proyectonan di gas natural y esunnan cu no ta di gas natural,” el a expresa. El a bisa tambe cu no tin nada diferente na loke nan tabata desaroyando desde dos aña pasa.
“Gas natural ta un combustible menos contaminante. Nos a pone como obhetivo e relanzamento di gas natural,” e mandatario a informa despues cu e siman aki a anuncia cu su ministerio lo ta facilitando e canalnan pa instalacion di gas natural den tur stacion di combustible na Republica Dominicana.
Nota di redaccion:
Republica Dominicana ta generando mas o menos 25% di su energia electrico cu gas natural, cu ta disponible desde 2003 via e terminal Andres di e compania Mericano AES. Mas di 50% di electricidad ainda ta bin di uso di heavy fuel oil o diesel. Tambe tin distribucion di gas natural na usuarionan mas chikito na e pais na nivel modesto, loke awor gobierno ta desea di amplia.
