(DiarioLibre) – Den su sesion ayera diabierna, e Senado a aproba un resolucion den cual ta otorga RD$ 3.000.000 como donacion na e victimanan afecta pa e explosion na San Cristobal cu, segun cifranan oficial, a laga 34 morto.
E propuesta di e resolucion a wordo someti pa e senador Franklin Rodriguez, representante di San Cristobal. E iniciativa a wordo introduci y aproba e mesun dia, manera legisladornan a acorda.
E recursonan, e resolucion ta splica, lo wordo entrega a traves di e Plan Strategico di San Cristobal y despues lo wordo dividi entre e famianan di e victimanan y e afectadonan pa e incendio.
Di mesun manera, e resolucion ta ordena cu un comision di senadornan, coordina pa e representante di San Cristobal y integra pa e voceronan di e diferente partidonan, ta haci entrega di e fondonan pa yuda e provincia.
E RD$ 3.000.000 ta bay wordo dirigi a traves di organisacionnan social lidera pa e Instituto Politecnico Loyola, e Camara di Comercio, e Conseho Empresarial y e Plan Strategico di San Cristobal.
Segun e motivacion di e proyecto den e Senado, e recursonan tin un prioridad halto pa e provincia y lo yuda como asistencia na e afectadonan, pa adkisicion di ekiponan pa emergencia y e habilitacion y ekipamento di e unidad pa personanan cu kemadura na e Hospital Juan Pablo Pina.
Den e mesun sesion, e senador Alexis Victoria Yeb, vocero di e Partido Revolucionario Moderno (PRM) den e Canara Alta, a informa cu a traves di su fundacion e lo haci donacion di RD$ 500.00 pa San Cristobal.
Siman pasa, e Camara di Diputado a aproba un resolucion similar pa haci un donacion di RD$ 2.000.000 na e afectadonan na San Cristobal.
E placa cu wordo duna ta sali di e salarionan di e diputadonan, ken mester a haci donacion di RD$ 10.000 cu a wordo kita for di nan ganashi.
