Candidato Gonzalo Castillo, kende tin apoyo di e Presidente Dominicano, Danilo Medina, diadomingo pasa a impone den eleccionnan primario oficialista riba e ex-Presidente Leonel Fernandez, pa un margen di diferencia estrecho di 12.700 voto, pero Fernandez a rechasa e validez di e resultadonan.
Castillo, empresario di 58 aña, tabatin 48,% di voto, compara cu 47,61% di Fernandez, cu e 99,68% di e resultado di e prome eleccionnan primario habri den historia di e pais y di cual e resultado a causa tension fuerte entre e dos coriente dominante na e Partido di Liberacion Dominicano (PLD).
Cu e resultado aki, Castillo a proclama ganado di e primario di PLD, loke a califica como un ‘historico victoria’, aunke a sigura cu ainda ‘falta un caminda largo’ pa eleccionnan na mei di 2020.
Den e cita electoral aki, e ex-minister lo tin como rival principal e empresario Luis Abidaner, kende diadomingo a impone cu margen amplio di 74,07% di voto, den eleccionnan interno di e Partido Revolucionario Moderno (PRM).
E victoria di Castillo a keda mancha pa e decision di Fernandez di no reconoce e resultadonan, cual ta considera cu a ser ‘manipula’.
Fernandez a sembra duda riba e limpiesa di e proceso electoral, den special, riba e sistema di voto automatisa, cu pa prome biaha a uza na e pais.
Un bes cu e resultado tabata irevocabel, Fernandez a rechasa e validez di e eleccion, el a afirma cu ‘a manipula e boluntad popular’.
E Presidente di e Hunta Central Electoral (JCE), Julio Cesar Castaños Guzman, ken a defende e bon funcionamento di e sistema, a sigura cu e voto automatisa ‘a funciona bon, hopi bon’.
