(DiarioLibre) – E Asociacion Dominicana di Profesornan (ADP) ta bay realisa un protesta dia 23 di april dilanti e Ministerio di Educacion, cu e obhetivo di cumpli cu loke a wordo acorda pa loke ta trata e aumento salarial pa docentenan.

Di mesun manera, ADP a aproba un plan di lucha cu e meta pa obtene mehoracion di e condicionnan di infrastructura di e scolnan, contratacion di personal di seguridad y limpiesa, miho programanan di formacion pa docentenan, nombramento di docentenan cu falta y finalisacion di scolnan cu ta den proceso di construccion.

Ademas di esaki tambe reparacion di e bañonan, awa limpi y coolernan pa e scolnan, personal di docente, reduci e sobrepoblacion escolar y cu tur e muchanan Dominicano haya un cuminda y snack na scol. Tambe soluciona e problema di intoxicacion door di fumigacion na e scolnan di San Francisco de Macoris, Villa Altagracia y otro localidadnan di e pais.

E gremio aki a manifesta, ademas, cu esaki y otro dificultadnan ta e causanan principal cu a impedi cu e scolnan publico por cumpli cu e calendar escolar y cu por logra e desaroyo di e competencianan na cual e cirriculum Dominicano ta aspira.

Durante e reunion di su di ocho Pleno Nacional de Dirigentes Magalys Perez a aproba pa exigi un aumento di salario, segun loke a keda acorda den luna di juni di aña pasa, sosteni den e hecho cu e Ministerio di Educacion ta conta cu e fondonan suficiente pa mehora e salario di e docentenan, cual nan nivelnan actual a perde poder adkisitivo, poniendo e costo di e basket familiar na cuater mil peso mas caro cu e salario promedio di e docentenan.

El a indica cu e Pleno Nacional de Dirigentes tambe a acorda un serie di asambleanan den e 155 seccionalnan di ADP, cuminsando desde awe 19 di april pa orienta e meastronan ariba e plan di lucha.

E presidente di ADP, Eduardo Hidalgo, den declaracionnan na e medionan di comunicacion, a bisa cu ora di considera e inflacion y e indice di prijsnan pa consumidor, e salario promedio di e docentenan ta keda na RD$40.967, mientras cu e costo nacional promedio di e basket familiar ta alrededor di RD$44.467.

Hidalgo a sostene cu Republica Dominicana ta un di e paisnan cu menos ta inverti den retribucion pa e docentenan, como parti di e presupuesto total di educacion pre universitario. “E gasto total di retribucionnan pa e docentenan di e scolnan publico Dominicano ta bao di 40% di e presupuesto total di e 4% pa educacion, den e ultimo dos añanan, locual ta constitui 30% menos gasto cu e promedio di Latino America,” e dirigente a indica.

E presidente di ADP a bisa cu, den e ultimo reunion na e mesa di negociacion cu Minerd, e propuesta cu comision di funcionarionan di e Ministerio di Educacion, tabata di un 8%, locual ta un propuesta cu nan no por acepta ni procede cune.