(DiarioLibre) – Organisacion di Estadonan Americano (OEA) a afirma diamars ultimo cu durante celebracion di eleccion presidencial y di congreso diadomingo ultimo tabatin mehoracion significativo compara cu e eleccion municipal cu a tuma luga den luna di februari, pero a adverti cu nan a observa un biaha mas e cumpramento di votonan di parti di e forsanan politico den diferente luga di votacion.

Den un documento emiti pa e Mision di Observacion Electoral (MOE) di OEA cu a duna siguimento den e tereno na e eleccionnan Dominicano, y cu e ex presidente di Chile, Eduardo Frei, a lidera, ta establece cu e mester ta un compromiso di tur e actornan di e proceso, sigui desaroya accion- y politicanan cu ta permiti combati y extermina e situacion aki.

MOE a reconoce e trabao di e Junta Central Electoral (JCE), organismo responsable di e organisacion y celebracion di e eleccionnan, y a opina cu e organo Dominicano a asumi un compromiso door di implementa e recomendacionnan di OEA formula despues di e eleccionnan municipal di luna di februari, como tambe pa e predisposicion cu el a ofrece na e solicitudnan di tur e partidonan politico.

E Mision a formula un serie di recomendacion na e JCE y na e actornan di e sistema cu e obhetivo di mehora e celebracion di e eleccion.

Entre esakinan ta inclui extende e testnan di carga y stress na e funcionalidad di e sistema digital electoral relaciona na e liberacion di boletinnan den e huntanan electoral, cu e meta di evita e desaceleracion observa entre e recepcion central di e actanan y e liberacion di e boletinnan di parti di huntanan.

Di mesun manera, inicia cu e divulgacion di resultadonan na e pueblo via website na mesun momento cu ta cuminsa e acceso di medionan di comunicacion y partidonan politico, cu e obhetivo di no genera e percepcion cu e publicacion di resultadonan online ta falso.

Nan a sugeri tambe pa diseña carchinan di votacion di diferente color pa cada nivel di votacion y cu dicho color mester coresponde cu e urna na unda cada carchi mester wordo deposita. Den e orden ey, realisa test y revisionnan pa comproba cu e color of cantidad di inkt di e carchinan di votacion of di e marcanan no ta genera inconveniente na momento di eherce voto.

OEA a referi na cu e garantianan pa equidad den e eleccionnan, faboreci pa e acceso na financiamento publico, entre otro factornan, mester wordo compaña pa e cumplimento estricto di e obligacionnan di transparencia y rindimento di cuenta di parti di e organisacionnan politico y candidaturanan.