(DiarioLibre) – Despues di un proceso amplio di negociacion tripartite den seno di Comite Nacional di Salario, Minister di Labor, Luis Miguel De Camps Garcia a anuncia diabierna cu nan a yega na un acuerdo pa aumento di salario minimo di e trahadonan den sector turistico.
Durante un rueda di prensa cu a tuma luga na Ministerio di Labor, na cual tambe tabata presente e representantenan di e sectronan di e trahadonan y dunadonan di trabao, a duna di conoce e detayenan di e acuerdo, cual ta representa un aumento promedio di 23% di salario minimo den sector di turismo.
E aumento lo wordo aplica segun e clasificacion di e empresanan, distribui den 20.7% pa trahadonan di empresanan grandi, 28% pa trahadonan di empresanan mediano y 26.9% pa trahadonan di empresanan micro y chikito.
“E acuerdo aki ta representa un hecho historico pa e trahadonan di e sector aki, pasobra e ta esun di porcentahe mas halto durante ultimo 17 aña y pasobra ademas e aumento lo tin un aplicacion retroactivo pa luna di augustus di 2021” Minister De Camps a indica.
De Camps Garcia a splica cu e caracter retroactivo aki di e aumento salarial ta representa un gran logro pa e trahadonan turistico, ya cu e lo tin un impacto positivo den e beneficionan cu nan ta ricibi, incluyendo e sumanan di presupuesto di sistema di seguridad social, e calculacion di dobel sueldo, entre otro beneficionan vincula na salario.
“Otro elemento importante ta cu e aumento di salario aki practicamente ta duplica den porcentahe e indice di inflacion acumula for di e ultimo aumento di e sector, cual a wordo aplica na augustus di 2019” De Camps Garcia a agrega.
