Republica Dominicana: Miles di docente ta reclama aumento salarial durante manifestacion na Santiago

(DiarioLibre) – Miles di docente a concentra diaranson dilanti oficina di Ministerio di Educacion na Santiago, exigiendo pago di bonus y aumento di salario, relaciona cu Dia di Trahado, dia 1 di mei.

E educadornan, bisti na blauw, ta pidi un aumento salarial di un 20%. Ademas nan ta exigi e nombramento di personal di docente, administrativo, di seguridad y di limpiesa.

Nan ta solicita tambe na autoridadnan pa interveni den e infrastructura di scolnan cu ta den mal estado, finalisacion di scolnan cu ta den construccion, mehoracion di programanan di formacion pa docentenan, entre otro exigencia.

Maximo Gomez, papiando den representacion di Asociacion Dominicana de Profesores (ADP), a sigura cu e mobilisacionnan cu a desaroya ariba Dia di Trahado cu ta wordo desaroya riba nivel nacional ta un derecho cu ta consagra den e Constitucion di Republica Dominicana.

Di mesun manera, el a bisa cu nan ta demanda pa cumpli cu e acuerdo firma dia 23 di juli 2023, unda a yega na acuerdo pa un aumento salarial di 20%.

Durante e manifestacion, Asociacion Dominicana de Profesores a anuncia un jornada di lucha cu paro di e lesnan regional te cu for di gobierno central nan cumpli cu e compromiso cu nan a yega na dje casi un aña pasa caba.

Despues di a keda pa casi un ora rond di oficina di Ministerio di Educacion, un comision di ADP a wordo ricibi pa director na Santiago di Minerd, Marieta Diaz, na ken nan a entrega un documento cu e lista di nan exigencianan.

E educadornan tabata carga poster cu mensahenan cu tabata relaha nan exigencia. Nan tabata vocifera tambe slogan manera: “E lucha aki ta bay yega na Palacio Nacional”, “E pueblo uni hamas lo wordo venci”, “E lucha aki no ta stop ni cu bomb ni cu bala”, “Angel Hernandez, pichon di dictador”, “Nos ta riba caya y nos no tin miedo” y “Nos ta solamente keintando e brasa”, entre otro.

Un ploeg fuerte di agentenan policial a mantene vigilancia di e concentracion di manifestantenan, cual a afecta e transito di vehiculonan den e zona di e edificio di oficinanan gubernamental, ubica na avenida Salvador Estrella Sadhala, na Santiago.

Di mesun manera, na Santo Domingo e educadornan a realisa un marcha unda nan tabata demanda e mesun pagonan, dilanti edificio di Ministerio di Trabao.