(DiarioLibre) – E intercambio comercial entre Dominicano y Haitiano den e mercado fronteriso di Dajabon a tuma lugar di manera normal ultimo weekend, maske algun Haitiano tabata inconforme.
A bira conoci cu diahuebs anochi, e comerciantenan di Haiti a tene un reunion na e comunidad di Juana Mendez cu obhetivo di bolbe cera e paso fronteriso pa asina rechasa “e falta di apertura di e parti migratorio” Dominicano.
Segun comerciante Johnny Pierre Burton, decenas di Haitiano ta acudi diariamente na Migracion Dominicano pa stempel nan paspoort cu visa y asina por biaha a traves di e diferente aeropuertonan di Republica Dominicana. Sinembargo, e ta denuncia cu autoridadnan ta emiti stempel “por caritas.”
“Nos ta pasa mas di dos siman akinan y na Migracion nan ta stempel solamente esnan cu nan kier of esnan cu paga 100 dollar. Nos ta pidi presidente Luis Abinader pa duna nos oportunidad pa por biaha di forma legal, esnan entre nos cu tin visa legal kier haci lo corecto,” Pierre Burton a solicita.
Di su banda, Mireles Charlie a denuncia e inseguridad den e mercado fronteriso, loke ta haci cu comerciantenan ta sinti “hopi incomodo” den e lugar. “Tanto Dominicanonan como Haitianonan ta hay nos mercancia y placa confisca. Nos ta exigi pa autoridadnan municipal duna atencion na e yamado aki.”
