(DiarioLibre) – Procuraduria General di Republica Dominicana a ehecuta diasabra pasa e asina yama “Operacion 13”, mediante cual a haci 15 entrada hudicial cu a resulta den aresto di 10 persona pa nan envolvimento den un supuesto fraude miyonario na Loteria Nacional.
E intervencionnan realiza na Distrito Nacional y provincia Monseñor Nouel y Santo Domingo, a termina den aresto di entre otro e administrador di e Loteria, Luis Maisichell Dicent, y Valentina Rosario Cruz, cu hunto cu Miguel Mejia ta presenta e sorteo na television.
E caha di Pandora a habri den e sorteo di dia 1 di mei ultimo, unda number 13 a sali na promer lugar, cu 69 na segundo y na tercer lugar 13 a bolbe sali. Den e video di e transmision, cu posteriormente administracion di Loteria a suministra, por mira cu e ‘invidente’ Miguel Mejia cu ta saca e bolitanan cu wowo tapa, a simula pasa e bolita pa presentadora Valentina Rosario Cruz, cu tabatin un bolita cu number 13 caba den su man. Cu e estafa aki gran cantidad di lugarnan di loteria a dencuncia cu nan a sufri perdida miyonario, cu lo por acumula na mas di 150 miyon peso Dominicano (US$2,6 miyon), solamente den e sucedido di dia 1 di mei. Den un entrevista na un programa di radio popular, Mejia a admiti cu nunca el a saca un bolita den e sorteo y cu nan a ofrece 800.000 peso, cu despues el a dicidi di no cobra. Mejia a ser interoga tambe pa Ministerio Publico.
E operacion tabata a cargo di procuradornan adhunto Yeni Berenice Reynoso y Wilson Camacho, responsable di Direccion General di Persecucion di Ministerio Publico y di Procuraduria Specializa di Persecucion di Corupcion Administrativo (Pepca), respectivamente.
