Presidente Danilo Medina a firma otro prolongacion di estado di emergencia, vigente desde ayera diadomingo, cu e meta di mantene e medidanan di contencion di Covid-19, cu protesta di parti di oposicion cu no tabata haya esaki necesario.
E periodo di excepcion, e di cinco desde cu e pandemia a inicia dia 19 di maart pasa, lo keda extendi pa 17 dia, te 30 di juni, segun decreto 2013-20.
Como parti di e medidanan den e estado di emergencia tin e toque de queda, cu desde ayera ta cuminsa 8:00 or di anochi, un ora mas laat cu e anterior orario. E ta termina 05:00 or di marduga, manera e tabata caba.
Den decreto 2014-20, cu ta establece e toque de queda nobo, ta autorisa empleadonan di e Hunta Central Electoral pa ta riba caya pa facilita e preparacionnan pa eleccion dia 5 di juli proximo, unda lo elegi un presidente nobo, ademas senador y diputadonan pa Congreso Dominicano.
Aunke e regla nobo pa toque de queda ta duna un ora mas di libertad, gobierno ta urgi ciudadania pa mantene distanciamento social y limita salida di cas na asunto estrictamente necesario.
Ultimo dianan e casonan positivo di Covid-19 ta aumentando, cu un total di caso nobo den 24 ora pa diasabra pasa di 564. E total general di caso positivo a yega 22.922 diadomingo, mientras cu dia 10 di juni e conteo total ainda tabata na 20.410, cu ta representa un aumento diario constante di mas di 500 caso nobo, pa promer biaha den e proceso te awor. Tin registra 577 morto en total te cu diadomingo.
