(DiarioLibre) – Debe publico a crece cu mas velocidad cu e poblacion mes, loke ta aumenta e suma cu ta cay riba cada persona (per capita).
E aumento den nivel di endeudamiento publico a haci cu cada ciudadano debe awor US$5.213, un suma cu ta equivalente na 302.979 peso Dominicano segun tasa di cambio actual, di acuerdo cu e cifranan oficial.
Debe publico per capita a aumenta cu 20% na ciere di aña pasa, a causa di e efectonan di e crisis di Covid-19 riba economia, cu a obliga gobierno Dominicano pa busca mas debe pa compensa e caida grandi di entrada di impuesto di gobierno.
Na 2019 cada Dominicano tabatin un debe di 4.337 dollar, un cantidad cu ya tabat mustra un aumento continuo durante ultimo añanan, segun e datonan oficial.
Direccion di Credito Publico di Ministerio di Finanzas a reporta e luna aki cu e debe publico consolida, cu ta inclui e compromisonan di sector publico no financiero y di Banco Central, ta situa na 54.469 miyon dollar na 2020, un año den cual e endeudamiento publico a subi casi 10.000 miyon dollar.
Contrario na e situacion aki, Producto Interno Bruto (PIB; GDP) Dominicano, di 78.829 miyon dollar na ciere di aña pasa tabata per capita un entrada di promedio di 7.544 dollar pa cada uno di e 10.44 miyon persona cu ta biba na Republica Dominicana. Di e manera aki e corelacion entre debe publico y GDP tabata na 70%.
Den ultimo añanan tabatin un aumento di debe publico cu ta mas grandi cu e cerecemento di e poblacion, causando cu e debe pa cada persona ta uamenta mas rapido ainda. Mientras poblacion apenas a crece cu 0.8 % entre 2019 y 2020, e suma di compromiso di estado Dominicano a dispara cu 20.2 % den e mesun periodo.
