Ayera mainta, na Plaza Juan Pablo Duarte, y den presencia di mandatario, embahador y invitadonan special, comunidad Dominicano na Aruba a celebra e di 181 aniversario di nan independencia.
Comunidad Dominicano na Aruba tin un raiz profundo, y e dos nacion historicamente tin bon cooperacion cu otro. Prome minister Evelyn Wever-Croes a recorda cu e lasonan aki a cuminsa di tempo tabatin e industria di sucu na unda varios Arubiano y Curasoleño a bay biba y traha eynan.
Despues a bin e temporada di industria di refineria na Aruba sigui pa turismo na unda hopi ta esnan cu a bin back pa establece nan mes akinan. Manera nos libertador Betico Croes semper a bisa; Arubiano no ta solamente esun cu a nace na Aruba sino tambe esun cu a haci di Aruba su hogar, manera el a bisa durante un discurso ayera marcando e ocasion.
Presidente di Parlamento, Gerlien Croes a pone un kraans dilanti e momumento di Juan Pablo Duarte den nomber di Parlamento, mientras prome minister Wever-Croes a pone uno den nomber di gobierno. Cuerpo Consular, fundacion, y otronan a pone kraans tambe como muestra di aprecio y respet.
Consul Dominicano na Aruba, Luis Perez Delgado tambe a duna un discurso, unda a reflexiona riba e logronan di Republica Dominicana, incluyendo 181 aña como un nacion independiente.
