Republica Dominicana: Congreso ta studia ley cu ta establece lesnan obligatorio di defensa personal pa mucha muhe

(DiarioLibre) – E enseñansa obligatorio di defensa personal na e centronan educativo publico y priva di e pais, por ta un medida dispuesto a traves di un proyecto di ley cu ta wordo analisa den e Camara di Diputadonan y cu ta pa mucha- y hobennan muhe por conta cu e mecanismo- y hermentnan necesario pa nan proteccion.

Segun e iniciativa di ley aki, e ministerio di Educacion ta bay bira e ehecutor di henter e proyecto aki cu ta enfoca ariba defensa personal na e scolnan y ta contempla pa e practicanan wordo ofreci na mucha- y hobennan muhe entre edadnan di 10 pa 17 aña.

E proyecto a wordo deposita na e Camara di Diputadonan pa e diputada Faustina Guerrero, representante di El Seibo pa e Partido Revolucionario Moderno (PRM), ken a considera cu na Republica Dominicana diariamente ta sali un cantidad di noticia ariba desaparicion- y agresionnan contra hende muhe cu mester wordo combati.

“Tur persona tin derecho na cu su integridad fisicio, mental y moral ta wordo respeta y na biba sin violencia teniendo e proteccion di e Estado den caso di un menasa, riesgo of violacion di e mesunnan aki,” un di e reflexionnan di e iniciativa legislativo ta sostene.

Pa apoya su proyecto, e legisladora Guerrero a cita un articulo den materia di igualdad di genero na Latino America y Caribe publica na aña 2020, den cual ta bin dilanti evidencia cu ta mustra cu Republica Dominicana tabata e di dos pais di e region cu e cifra mas halto di feminicidionan cu un promedio di 2.4 hende muhe asesina pa cada 100 mil.

Den e sentido ey, e diputado ta alega cu e implementacion di enseñansa di defensa personal pa mucha- y hobennan muhe ta bay permiti sensibilisa, conscientisa y yama atencion ariba e problema social di violencia contra hende muhe, como tambe ta bay alerta e Estado pa nan tuma e medidanan necesario pa reduci e cantidad di feminicidionan cu ta tuma luga na e pais.

“E ta necesario pa tur e mucha- y hobennan di e pais tin conocemento di defensa personal pa asina na cualkier momento cu nan ta den peliger, nan tin e herment- y habilidadnan necesario pa nan por defende nan mes,” e diputada a conclui den su propuesta congresual.