(DiarioLibre) – E provincianan cu ta bou alerta a ser aumenta na 15 dilanti e efectonan di horcan Beryl, cual ta mantene su categoria 4
E Centro di Operacionnan di Emergencia (COE) tin cinco provincia cu alerta geel y 10 cu alerta berde. E provincianan cu alerta geel ta San Cristobal, Barahona, Pedernales, Peravia y Azua.
Den alerta berde tin e Districto Nacional, Santo Domingo, La Altagracia, Monte Plata, Independencia, La Romana, San Pedro de Macoris, Hato Mayor, Monseñor Nouel y La Vega.
E COE a recomenda e personanan pa abstene di crusa riu of rooinan cu ta presenta volumennan di awa halto na e provincianan cu ta bou alerta.
Igualmente, tur e embarcacionnan mester permanece mara na un waf, for di Miches (El Seibo) te cu Isla Beata, pa motibo di e peliger y olanan fuerte di e sistema tropical aki.
E acumulacion di awacero spera como consecuencia di e poderoso horcan Beryl, di categoria 4, por alcansa na Republica Dominicana balornan di entre 50 y 150 milimeter cuminsando diamars marduga di manera gradual, segun e Oficina Nacional di Meteorologia (Onamet) a informa.
Onamet ta premira cu, cuminsando diamars marduga e olanan ta bira peligroso di manera progresivo na henter e zona costero sur, sperando olanan cu lo por supera 15 pia di haltura, esaki na momento cu Beryl yega mas cerca na e liña di Republica Dominicana y no ta descarta algun penetracion marino costero na zonanan abou.
E wowo di Beryl ta bay aleha di e sur di e Islas de Barlovento y lo pasa rapidamente na e oeste pa oeste-noroeste durante e proximo dianan.
Den e trayectoria premira, e wowo di Beryl ta bay move a traves di e lama Caribe sureste y central for di awe te cu diaranson.
