(CNNEspañol/DiarioLibre) – Scolnan publico na Republica Dominicana a habri atrobe dia 11 di januari pasa, bao protesta di maestro y alumnonan. E protesta a haci cu solamente 30% di e alumnonan a cuminza bay scol atrobe. E temor tabata relaciona cu e aumento di caso di Covid-19, mas specificamente e variante Omicron, den e di cinco ola di e coronavirus na e pais.
Oposicion contra apertura di e scolnan promer cu fin di januari tabata bin di Asociacion di Profesor (ADP), cu tabata teme cu e propagacion di e virus lo a intensifica. Dia 14 di januari e ola a yega na su peak, cu 40.440 caso activo. Segun ADP, cu a exhorta e maestronan pa no asisti na scol te cu 31 di januari, den al menos 25 di e 32 provincianan di e pais e maestronan a responde na e yamado, y no a presenta pa duna les.
Di otro banda, den un comunicado Ministerio di Educacion a considera e reanudacion di scol presencial “un gran exito” ya cu a conta cu participacion di “mas di 36% di e matricula estudiantil”, compara cu un promedio historico di entre 28% y 38% riba promer dia di scol.
Mientras den promer mitar di januari e pais tabata na un nivel halto di caso activo, y na mas di 6.000 caso nobo pa dia, e imagen aki a cambia bastante yegando fin di luna. Ministerio di Salud Publico a reporta ayera dialuna cu tabatin 1.358 persona cu a recupera di e coronavirus, y cu a registra 1.193 caso nobo, dos fayecimento, y 8.541 caso activo dia 30 di januari, loke ta indica e tendencia di mehoracion considerable. Autoridadnan di salud a registra te awor 555.245 caso di Covid-19 desde maart 2020, mientras en total a fayece 4.307 persona.
