(DiarioLibre) – Centenares di activistanan di diferente grupo feminista a realisa diadomingo ultimo un manifestacion na e Zona Colonial, probechando e conmemoracion reciente di e Dia Internacional di Hende Muhe pa exigi na e gobierno medidanan firme cu ta garantisa e cumplimento di e derechonan di hende muhe den diferente ambito.

E manifestantenan a pronuncia nan mes contra di e cifra halto di feminicidio na e pais, e falta di un regulacion cu ta garantisa seguridad social y salarionan digno pa e trahadonan domestico, e inclusion di e tres factornan di aborto den e Codigo Penal Dominicano y e eliminacion di e violencia policial contra di hende muhe afro-descendiente, particularmente esnan Dominicano di descendencia Haitiano y migrantenan Haitiano den estado di gestacion, entre otro causanan.

“A pesar cu e muhe Dominicano ta establece e principionan y mandato pa igualdad di hende, y ta condena tur privilegio y tur situacion cu ta menasa cu kibr’e, nan ta viola e derechonan fundamental di e hende muhe den tur forma di relacionnan social, afo y paden di hogarnan, den empresanan, den e partidonan politico, den iglesianan, den gobierno central, den e Congreso, den husticia y den tur forma di organisacion existente,” nan a indica den un manifiesto conhunto.

Den e documento lesa den publico, nan a señala cu e hende muhe ta keda e poblacion mas vulnerable na pobresa, cu un 24.1%, 2.3% riba di hende homber, referiendo na datosnan recientemente publica pa e ministerio di Economia, Planificacion y Desaroyo.

Di mesun manera nan a indica cu, a pesar cu hende muhe ta conta pa un 41.7% di e total di e poblacion economicamente activo, ta existi un buraco di genero di e empleonan formal di 9.2%.

Den e tono ey, nan a recorda cu e hende muhe cu ta dedica na e trabao domestico ta sigui sin regulacion cu ta garantisanan un salario digno y derechonan laboral, manera por ehemplo inclusion na seguridad social y pensioen.

Pa e secretaria di e Asociacion de Trabajadoras del Hogar, Elena Perez, e abolicion di e resolucion cu e ministerio di Trabao a emiti, despues di un fayo di e Tribunal Constitucional, den un intento pa regularisa e trabao domestico, esaki ta un retraso pa un grupo di trahadonan cu ainda no tin acceso na e formalisacion di nan servicionan.

El a señala cu, aunke e Comite Nacional de Salarios, a establece un minimo cu mester paga nan pa nan trabao, esaki no ta suficiente pa cubri nan necesidadnan. “E salario cu un trahado di hogar mester gana mester wordo someti na un estudio entre tur e partinan, cu nos por sinta na un mesa di dialogo y realmente, dignifica loke ta e trabao di hogar,” el a señala.

E manifiesto tambe ta trece pa dilanti e preocupacion pa e violencia machista contra di e hende muhe.