(DiarioLibre) – Republica Dominicana a logra cierto avance den persecucion di e delito di explotacion sexual y comercial di mucha y adolescente, sin embargo, ainda ta keda debilidadnan serio den maneho di e casonan ey. Un di nan ta e porcentahe di condena, ya cu apenas 30 % di e casonan cu ta denuncia ta logra e decision final den corte, segun un estudio cu Mision Internacional di Husticia (IJM) a haci al respecto.
Ta trata di un estudio di e desempeño di e sistema di husticia encuanto traficacion di persona cu meta di explotacion sexual, y explotacion sexual comercial di mucha y adolescente, 2010-2022”, cu ta abarca e revision di expediente y caso cu a drenta na 22 fiscalia di 22 provincia prioriza pa e investigacion.
E organismo no gubernamental a haci un revision di e casonan cu a yega na e sistema hudicial na nivel policial y di ministerio publico. Di 98 caso registra den e periodo, 87 a logra un aresto di persona envolvi, di cual 70 a haya acusacion. Esnan cu a haya condena tabata 30 caso.
Segun e revision, a logra un aresto den 86.7 % di caso, tabatin acusacion formal den 71.4 % di caso y huicio final den 33.7 % di e casonan. A logra condena den 30.6 % di caso.
A constata tambe cu tin un diferencia entre registracion cerca Polis nacional y Ministerio Publico. Den e periodo 2018-2021 departamento di traficacion di persona di Polis Nacional a traha riba 89 caso califica como explotacion sexual y comercial, pero Ministerio Publico a registra 61 caso so den e mesun periodo. En total den 12 aña a haya 130 caso na Polis y Ministerio Publico 98. Remarcable tabata e aumento di caso den ultimo añanan. Polis a pasa di 0 caso na 2010-2013, pa 41 caso entre 2014-2017, y 89 entre 2018-2021.
