E cantidad di morto a causa di dengue na Republica Dominicana a subi te na 22 den e ultimo siman, segun informacion di Ministerio di Salud Publico den su boletin di dialuna ultimo.
E boletin ta registra 843 caso di dengue notifica den siman 35, di 25 pa 31 di augustus, mientras cu e total pa e fecha ey tabata di 10.636 caso comproba.
Tres cuarto di e casonan registra ta di mucha bao di 15 aña, segun e boletin divulga pa Direccion General di Epidemiologia di ministerio di Salud Publico.
E unico provincia Dominicano unda a declara un brote di dengue ta San Jose de Ocoa, na west di Santo Domingo, unda e incidencia acumula di e enfermedad ta alcansa 565 caso pa cada 100.000 habitante. Tin 29 otro provincia den alerta geel y tin dos so, Puerto Plata y Samana, den alerta berde, e categoria mas abao.
Aliansa pa Derecho di Salud (Adesa), un coalicion di ONG comunitario, campesino y sindicato, a denuncia cu e riesgo di dengue ta aumenta na Republica Dominicana pasobra 23.6 % di e hogarnan tin tanki di awa instala den patio, cu por ta criadero di sangura. Na 2015, e ultimo aña cu incidencia halto di dengue na e pais, a registra 103 morto y 16.871 hende contamina.
