(DiarioLibre) – E autoridadnan Dominicano ta tumando e pasonan necesario pa e economia mantene su ritmo di crecemento, di acuerdo cu e minister di Economia, Planificacion y Desaroyo (Mepyd), Miguel Ceara Hatton.
“E numbernan di crecemento economico cu ta ser spera pa e aña aki ta balansa entre, e mas pesimista lo duna 6% of un 7%, esun mas optimista lo duna 11%. Afortunadamente, nos ta tumando e pasonan necesario”, el a bisa.
El a indica cu e tema di vacunacion ta esencial, “e ta e defensa cu nos tin. E menasa di otro brote di e malesa y e unico forma di contraataca esey ta cu e vacuna pa nos por tin e economia habri”.
E funcionario a papia di e terminonan ey despues di a anuncia cu e gobierno Dominicano, a traves di e Ministerio di Economia, Planificacion y Desaroyo (Mepyd), lo desaroya 41 proyecto na 21 districto municipal cu tin un porcentahe di pobresa di alrededor di 90% of mas.
El a indica cu nan ta bay realisa 41 proyecto distribui den construccionnan chikito, manera acera, containers, santana, funeraria, instalacionnan deportivo, mataderonan, mercadonan, parke, plaza, proteccion di e medio ambiente, reconstruccion di camindanan, servicionan social basico, dumps y obranan complementario.
Pa e ehecucion di e obranan aki, Ceara Hatton a anuncia e entrega di RD$19.7 miyon cu lo wordo implementa durante un aña y ta busca pa impacta e calidad di bida di 89.774 persona, lo emplea 1.488 trahado pa e man di obra directo den e proceso di ehecucion y lo ta 453 persona pa man di obra directo una bes e proyectonan keda cla.
“Awe nos a bin pa ehecuta e ideanan cu nos a bin ta traha y pensa riba dje for di hopi tempo caba”, Ceara Hatton a indica.
El a enfatisa cu nan ta ehecutando e ideanan pasobra mester mehora e condicion di bida den e teritorionan, “cu ta caminda e hendenan ta biba, y esey ta nos compromiso, esey semper tabata e compromiso di e gobierno di Luis Abinader”.
