Repsol ta stop campaña di exploracion pa petroleo of gas

Pa medio di e comunicado aki, Compania Arubano di Petroleo (CAP) kier informa pueblo di Aruba cu Repsol no ta sigui cu e campaña di exploracion pa petroleo of gas (hidrocarbon) den awanan teritorial di Aruba. Repsol a dicidi pa no drenta e siguiente fase di e contract cu e tin cu CAP. E contracto firma pa ambos partido na december 2012 a yega su fin dia 30 di november di 2019, despues di un periodo total di 7 aña.

Den un comunicado di CAP, ta detaya cu e rason principal pa no continua cu e campaña di exploracion ta e resultadonan di e proefboring, Bon Bini-1X, pa noord di Aruba, cu a resulta den un ‘dryhole’. Despues di analisis di tur e informacion obteni di Bon Bini-1X, a corela esaki hunto cu e datonan sismico cu a adkiri na 2014 y 2015. Door di e corelacion aki por a reevalua e prospectonan bieu y kisas haya prospecto nobo den e awanan teritorial di Aruba. Despues di e reevaluacion aki, a determina cu no lo ta bal e riesgo financiero pa sigui explora.

Otro factor cu a contribui pa no continua cu e campaña di exploracion ta cu no a haya un otro socio pa comparti e riesgo financiero. E riesgo aki ta inherente na e industria di exploracion di hidrocarbon. Casi na mes momento despues cu e resultadonan preliminar di Bon Bini 1X a keda conoci, e compania Frances, Total a sali for di e joint venture na october 2018, lagando Repsol como unico compania pa carga tur e riesgonan financiero. Den e industria aki, specialmente den area fronteriso, no ta comun pa un compania opera su so, debi na e riesgo financiero concerni. Esaki no ta asina straño si ta conoci cu e chens cu un pos ta haya petroleo na un cantidad comercial den e areanan fronteriso ta entre 10 cu 30%.

Fase 3 di e contract a caba na mei 2019. Repsol a pidi pa un extension di fase 3 di 6 luna, pa asina haya mas tempo pa busca un socio pa drenta fase 4 di e contract. Aworaki e 6 luna a caba y esaki no a trece ningun cambio den e situacion. Debi na esaki, Repsol a dicidi pa no drenta e siguiente fase di e contract.

En todo caso, CAP kier a gradiciRepsol pa su interes y tur esfuerso cu e la mustra na Aruba. CAP tambe kier a bisa danki na tur e institucionnan, organisacionnan y stakeholders cu tabata involucra y a yuda den un forma of otro pa laga e varios operacionnan cu a tuma luga bay mas miho posibel.