Ex minister di energia y parlamentario di oposicion, Mike de Meza (AVP) ta haya cu gobierno actual no ta poniendo interes riba un proyecto cu por cambia historia economico di Aruba. E ta referi na e siguiente fase di boramento cu pronto e compania Repsol di exploracion di combustibel y gas ta cuminsa den awa teritorial di Aruba.
E ta haya cu e noticia aki ta algo bon pa pueblo di Aruba, pero sigur pa e generacionnan futuro. E proyecto aki di exploracion di gas y zeta ta conoce un fase nobo cu e presencia di e barco cu ta bay ehecuta e perforacion. Segun parlamentario de Meza ya caba e barco ta den e sitio cu ta e parti panort y pabou di Aruba. Mas of menos un 35 kilometer diagonal for di nos isla. El a bisa cu ya caba nan ta preparando pa bay den accion. Nan ta stabilisando e vloer unda e perforacion tin cu tuma luga.
“E ta un bon noticia. Ban spera cu bendicion di papa Dios cu esaki lo resulta den algo positivo”, e di. E ta haya cu e proyecto aki ta un di e salbacion mas grandi cu ta bay tin pa historia di Aruba. Nan lo sigui duna informacion riba esaki considerando cu durante casi 8 aña largo nan a traha riba e proyecto aki. Despues di varios test, studio, interpretacion y evaluacion for di aña pasa na luna di mei decision a wordo tuma cu pa dia 15 di juni kiermen ayera, e perforacion mester cuminsa tuma luga. Den e siguiente lunanan, eventualmente dos luna, lo wordo conoci e resultado pa explora gas y zeta den e awa teritorial di Aruba. “Si tin mineral den nos subsuelonan nan ta 100% di pais Aruba”, segun parlamentario de Meza.
Tin diferente proyecto riba tereno di energia cu e gobierno anterior a bin cu ne y cu ex minister de Meza ta considera bon proyecto, y cu despues no a wordo tende nada mas rond di nan, ora cu e gobierno actual a sinta casi 8 luna pasa. Entre nan e proyecto di gas natural, pero tambe e proyecto di energia alternativo na Lago Height cu ta conociendo un fin relaciona cu e parke solar mas grandi construi na Aruba.
E ta haya cu e proyecto aki ta bay yuda nos pais pa purba di wanta e prijs di electricidad cu awa stabiel na momento cu prijs internacional di crudo ta aumenta. E ta un proyecto cu e compania di utilidad WEB N.V, lo por ehecuta inmediatamente unabes cu e ta bin cla.
