Ayera un delegacion di Repsol a sinta cu e compania estatal CAP y prome minister Evelyn Wever-Croes riba e boramento na juni. Den un relato gobierno di Aruba cu Repsol a ‘sigura cu nan ta teniendo na cuenta tur aspecto di medio ambiente’. Sinembargo un experto di Sociedad di Ingeniero di Aruba (SIA) ta bisa cu esey no ta berdad.
E miembro di SIA, esta Leo Henriquez, ta un experto ariba tereno di exploracion y produccion di gas y petroleo. El a bin Aruba un par di aña pasa riba peticion di e gobierno anterior pa yuda cambia ley y tambe institui e parti di implementacion y control riba e exploracion y explotacion di e minanan di gas of petroleo bou awa. E reglanan ta necesario pa proteha siguridad, medio ambiente y asina yega na un bon inventarisacion di e riesgonan y medida necesario. Esaki entre otro tambe pa preveni cu algo lo pasa cu lo por tin un impacto negativo riba nos unico pilar economico, esta turismo.
E ta reacciona riba e relato cu gobierno a manda ayera riba e reunion cu e compania petrolero Spaño Respol. Den esaki por lesa lo siguiente:
“Riba pregunta di prome minister di Aruba ki efecto e exploracion tin na nos medio ambiente, Repsol a sigura gobierno cu nan ta teniendo na cuenta tur aspecto di medio ambiente. Cu esaki nan ta referi na e proteccion di nos beachnan y percura cu e exploracion no tin impacto riba nos beachnan ni nos medio ambiente en general.”
Acto ilegal
Pero den un declaracion extenso, sr. Henriquez ta bisa cu e informacion cu Repsol ta dunando no ta corecto. Hasta e ta bisa cu ‘Respol ta comete acto ilegal durante e proximo boramento y CAP NV di gobierno ta permiti esaki’. Manera conoci CAP ta e compania estatal lanta specialmente pa e exploracion y explotacion di e minanan bou awa.
E experto di SIA ta bisa tambe:
“ 13 di december 2017 Respol a consulta cu e organisacionnan cu ta proteha medio ambiente, unda e Sociedad di Ingeniero di Aruba (SIA) tambe tabata presente. Durante e consulta Repsol a duna splicacion tocante loke ta bay pasa y cu prome cu e actividadnan tuma luga un investigacion ta wordo haci cu ta yama Environmental Safety Health Impact Assessment. Pa asina determina cua medidanan mester tuma pa proteha entre otro e medio ambiente den e vecindario di e boramentonan. Despues di e consulta e organisacionnan presente a ricibi documentonan digital for di Repsol.”
Sr. Henriquez ta conta cu el a analisa e documentonan aki y ta conclui cu Repsol ta planea pa no tene su mes na ley, esta e Petroleumlandsverordening y e Petroleumlandsbesluit, vigente. “Aunke cu Repsol ta skirbi den e comienso di un di e documentonan cu lo sigui e ley di Aruba vigente.”
Desperdicio
Un di e puntonan ta cu e compania di petroleo a anuncia cu durante e boramento lo descarga tur sorto di desperdicio a consecuencia di e actividadnan. Sr. Henriquez ta bisa cu for di e documentonan e por lesa cu nan lo bay uza ‘drilling muds’. Esaki ta ‘un sorto di likido cu entre otro ta wordo uza pa controla e temperatura di e drill bit, cu ta reenforsa y stabilisa e pos y pa trece e pida piedra y santo bora door di e bit ariba pa asina tin un buraco’. E pida piedranan y santo tambe ta bay den lama. Mescos cu e drilling mud.
“Lo uza dos tip di drilling mud, uno cu ta wordo traha a base di awa di lama y un otrol a base di petroleo sintetico. Y specialmente e ultimo aki por causa hopi daño na e medio ambiente. Pero tambe den e drilling mud a base di awa di lama kimiconan hopi peligroso por wordo uza y descarga”, asina e experto ta bisa.
Proteccion
Den un di e documentonan di Repsol e compania aki ta skirbi cu tur e descarganan aki ta segun e practica di industria y acepta mundialmente como un standard, esaki sr. Henriquez tambe ta remarca.
“Pero esaki ta totalmente contra e berdad, pa motibo cu no tin un standard acepta mundialmente.”
Como ehempel e experto di SIA ta señala cu unda e la traha pa mas cu 30 aña, esta den Mar Norte, tur tera rond di e lama aki, cu ta Irlanda, Gran Britania, Noruega, Icelandia, Suecia, Dinamarca, Alemania, Hulanda, Belgica, Francia, Spaña y Portugal no ta acepta cu e desperdicio contamina cu drilling muds a base di awa di lama y petroleo sintetico ta wordo descarga asina sin tratamento of un permit. “E teranan aki ta uni den un Tratado di OSPAR di 1992 pa proteha e Mar Norte.”
Leynan local
Sr. Henriquez tambe ta bay den mas detayenan riba kico ta para den nos leynan local. E ta splica cu articulo 5 di e Petroleumlandsverordening ta regla entre otro e proteccion di medio ambiente den nos awanan. “Te hasta esun den awanan di e zona exclusivo economico cu ta 200 km ariba di e Aruba. E articulo aki ta duna e posibilidad di traha un Landsbesluit cu ta regla esaki mas en detaya. Y esey a sosode tambe na 1988 cu un cambio na 1990.”
E articulonan den e capitulo 5 cu tin como titulo na Hulandes ta regla e descarga di desperdicio durante un actividad di exploracion y produccion di petroleo of gas. “Den e capitulo 5 aki descarga di tur desperdicio ta prohibi cu excepcion si Repsol haya un permiso pa descarga awa y otro restonan sanitario cu ta wordo genera for di e toiletnan a bordo di e plataforma. Pa e ultimo aki minister mester duna un permit si pa cu e descarga.”
Tambe por tin un descarga ora cu e plataforma ta den estado di emergencia pa motibo di un explosion of otro daño severo entre otro un colision entre e plataforma cu un barco, segun e experto.
Bon Dia lo sigui riba e topico aki, y lo busca entre otro comentario di Repsol y tambe di e compania estatal riba e criticanan aki di e experto. Tambe lo kier sa kico e NGO nan ta pensa di e proceso aki y e rapport di Repsol riba e efectonan pa medio ambiente, siguridad y salud.
