Jose Manuel Olivares, diputado di Primero Justicia den Asamblea Nacional di Venezuela, a keda herida durante represion di banda di funcionario di Guardia Nacional Bolivariano na sector El Paraiso, Caracas.

Olivares a keda herida na su cabes, pa un bom lacrimogeno y despues el a ser hiba pa un hospital priva na Caracas.

Carlos Paparoni, diputado na Asamblea Nacional a denuncia riba su cuenta na Twitter cu funcionario di Guardia Nacional Bolivariano tabata lansa bom lacrimogeno contra manifestantenan riba nan curpa y dirigi linea recto riba nan, violando asina e norma, pasobra nan mester lansa bom lacrimogeno pariba, y pa asina no laga ningun hende herida.

E represion a cuminsa cu obhetivo di separa tur manifestantenan na algun punto caminda marcha tabata move, cu meta di yega te sede di Poder Electoral mientras miles di hende di oposicion tabata concentra na este di ciudad, cu obhetivo di yega te sede di Tribunal Supremo.

Freddy Guevara, Vice-presidente di Asamblea Nacional a sigura den un nota di prensa cu autoridad a purba di separa hende cu tabata cana na varios punto di Caracas, manera “Santa Mónica, avenida Victoria, Montalbán y O’Higgins”.

Hende cu tabata participa den e marcha na avenida Francisco di Miranda tabata purba di yega te sede di Tribunal Supremo di Husticia. Tribunal supremo ta situa den centro di Caracas. Autoridad di Venezuela no ta permiti e paso di marcha pa centro di Caracas, pasobra nan ta bisa cu e decision ey ta purba evita disturbionan manera a tuma lugar na luna di februari di 2014, tempo cu un marcha di oposicion a yega te na sede di fiscalia y eynan a produci hopi daño y 3 persona a perde nan bida tambe.

Ayera oposicion a cumpli un luna desde e dia cu nan a invita henter pueblo di Venezuela, pa e prome protesta na e pais, despues cu nan a sigura cu gobierno a haci un golpi di estado cu e publicacion di dos decision, caminda Tribunal Supremo a limita e inmunidad di diputadonan y otro decision unda nan a tuma e funcion di parlamento pa nan mes.

E ola di protesta a registra te awor 29 hende cu a fayece, 500 herido y mas di mil deteni.

Grupo di hende cu ta apoya gobierno di Maduro a marcha tambe na diferente punto di Caracas, pa asina celebra e dia di trahador y pa duna nan apoyo na Nicolas Maduro.