Despues di e fuerte control di forsa di siguridad di gobierno durante e manifestacionnan, 5 Venezolano a perde nan bida den ultimo dos siman den manifestacion di oposicion, cu a cuminsa como un rechaso na un golpi di estado cu segun nan a keda registra cu sentencia 155 y 156, di sala constitucional di Tribunal Supremo di Husticia.

E marchanan contra gobierno di Nicolas Maduro a inicia riba dia 4 di april y desde e momento ey, hende cu ta apoya oposicion politico na Venezuela a cuminsa cu protesta di manera spontaneo den centro urbano y sectornan popular. E protesta a ser convoca pa e partido Mesa di Unidad Democratico. Mayoria di protestanan a ser controla pa guardia nacional bolivariano y pa polis nacional of tambe pa militantenan chavista – e asina yama ‘colectivos’ – cu tabata cana cu arma di candela.

Foro penal Venezolano ta un organisacion cu ta protege derecho humano. Foro penal a raporta te dia diasabra cinco persona cu a perde nan bida. Den su informe e autor a menciona como hende responsabel di e represion e grupo paramilitar hunto cu polis cu tabata “actua contra manifestante cu e permiso di cuerponan di seguridad di Venezuela”.

Un informe cu a ser actualisa diadomingo a informa cu tin 538 hende deteni. Entre nan cerca di mita di hende a keda liber, pero te na momento aki 273 ta deteni pa un decision hudicial, un audiencia pendiente y un falta di fiansa.

E organisacion a destaca cu den manifestacion nan a registra hopi tortura y trato cruel, contra persona cu ta deteni. A mantene e persona sin comunicacion pa varios ora.

Cerca di 200 persona a keda herida den e protestanan, diputado Jose Manuel Olivares a bisa. Mayoria di hende herida a resulta afecta pa perdigon cu polis tabata tira. E regimen chavista a baha e cantidad di denuncia y a laga un banda e reclamonan di hende di oposicion. Gobierno ta tilda na di ta golpista y hasta terorista. Diadomingo diputado di Primero Justicia a bisa cu nan a denuncia na Nacion Uni e practica di tortura contra hende deteni. “Alejandro Sanchez a ser deteni y nan a colg’e na un brasa durante 48 ora, nan a tira gasolin riba su bachi” Tomas Guanipa a bisa periodistanan.

Guanipa a splica cu autoridad a menasa cu mata nan si nan no duna un denuncia contra legisladornan di Primero Justicia y pa asina acusa nan di comete hecho falso. Victimanan cu a muri den y alrededor di manifestacion a ser identifica como Jairo Johan Ortiz Bustamante (6 di april, Miranda), Daniel Alejandro Queliz Araca (10 di april Carabobo), Miguel Antonio Colmenares (11 di april na Lara), Bryan Principal (11 di april, na Lara, di 14 aña), Gruseny Antonio Canelón (13 di april, na Lara). Tur e personanan tabatin herida di arma di candela, corant El Nacional a informa.

Na e lista aki a suma otro victima, e polis Yey Amaro cu tabata yegando su cas na Lara, ora cu el a dicidi interveni den un protesta cu tabata tumando lugar den e zona ey y pa asina purba di regla un conflicto cu a presenta eynan, y net na e momento ey un auto a dal e. Gobierno y oposicion a duna acusacion diferente unda un ta culpa e otro di e responsabilidad di e sucedido fatal.

Dialuna Maduro a anuncia cu forsa arma ta distribui riba tur caminda di Venezuela desde e dia ey, faltando dos dia pa un manifestacion gran di oposicion, pa asina defende nan honor y duna un homenahe na e grupo di milicia civil.