Diabierna ultimo, Aruba a ricibi bishita di un delegacion di Hulanda esta e gezant vaccinatie y e beveiligingscoordinator cu a bin Aruba pa tuma nota di e proceso completo di e programa di vacunacion na Aruba.
Pa Aruba por a ricibi vacuna di Hulanda, un plan completo a wordo presenta na januari 2021 y a base di e plan aki Aruba a ricibi vacuna for di Hulanda. Diabierna cu a pasa representantenan di Hulanda a yega Aruba pa verifica cu enberdad e plan presenta ta wordo implementa. Por bisa cu e representantenan di Hulanda a keda hopi satisfecho cu nan bishita na e localidad di vacunacion y cu ful e proceso logistico con e ta funciona.
Na mes momento Aruba a probecha di presenta na e delegacion un otro plan di vacunacion masal, unda e meta ta pa vacuna riba 2 dia tras di otro un promedio di 10.000 ciudadano haciendo uzo di diferente localidad na mes momento.
Pa cu e plan aki, nos por informa comunidad cu Crisis Team a ricibi e autorisacion pa sigui cu tur preparacion pa haci e Vacunacion un realidad. Dentro di e siguiente dianan comunidad lo bay ricibi mas informacion riba e 2 dianan di vacunacion masal unda comunidad lo por yega, registra y vacuna. Mester bisa cu e representantenan di Hulanda a keda impresiona cu e efectividad y liheresa cu nos plan di vacunacion ta canando. Hulanda a bisa cu Aruba ta un ehempel pa otro luganan con ta ehecuta un plan di vacunacion. Un elogio grandi a ser vocifera pa cu e Aruba Health App cu ta wordo uza como plataforma pa registra e vacunacion na Aruba. Hulanda ta hopi satisfecho di e forma con minister di Salubridad Publico Dangui Oduber, Gobierno y Crisis Team a maneha e programa di vacunacion.
