Recientemente Hunta di Directiva di Hospital a ricibi un bishita di cortesia y orientacion di David Abrahams, representante di Hulanda na Aruba di parti di Ministerie van Binnenlandse Zaken en Koninkrijksrelaties.
A duna Abrahams informacion entre otro tocante e historia di Dr. Horacio E. Oduber Hospital, e structura di e organisacion, e diferente procesonan y tambe progreso nan cu Hospital ta pasando aden y e plannan pa futuro. Alabes a splica tocante e diferente servicionan y e relacion cu Hospital tin cu dokternan di cas y e specialistanan na Aruba.
Segun un comunicado di prensa, Abrahams sigur a haya e informacion masha interesante y a keda impresiona cu e cantidad di specialisacion cu tin na Aruba y e desaroyonan grandi cu tin riba tereno medico na Hospital.
Ademas, Abrahams a haya un recorido den e edificio nobo unda e por a mira diferente aspectonan di Hospital. A duna informacion di e cambionan amplio y ekipo ‘top of the line’ cu Aruba Hospital a adkiri. A mustra p.e. e departamento di emergencia cu tin un tremendo comparticion di cual tur tin nan funcion special. Tambe e structura di e cambernan nobo riba e pisonan di cuido cu alabes ta ofrece hopi mas privacidad y un estadia mas placentero.
Abrahams a menciona cu esaki sigur ta un adelanto grandi riba otro islanan den region y ta haya esaki un bon progreso pa cuido medico na Aruba, segun e comunicado ta finalisa.
