Un fluho di investigacion nobo ta sugeri cu mas hende tabatin coronavirus sin ningun sintoma, dunando speransa cu lo resulta di ta hopi menos mortal di locual originalmente a teme.
Mientras claramente esey ta bon noticia, esaki tambe ta nifica cu ta imposibel pa sa ken rond di bo por ta contagioso. Esaki ta complica decisionnan tocante bolbe bay trabou, scol y resumi bida normal.
Den ultimo siman, reportenan di infeccionnan silencioso a yega for di un shelter pa hende sin hogar na Boston, un carrier di marina Mericano, muhenan na estado na un hospital na New York, varios pais Europeo y California.
E cabesante di Centers for Disease Control and Prevention (CDC) di Merca, ta bisa cu 25% di persona infecta por no a presenta sintoma. Vice- presidente di Joint Chiefs of Staff, gen. John Hyten ta kere cu por ta hasta 60% te 70% entre personal militar.
Ningun di e cifranan aki por ta completamente confiabel pasobra ta basa riba test cu fayo y inadecua, segun Dr. Michael Mina di Harvard’s School of Public Health.
Colectivamente, sinembargo, nan ta sugeri cu nos cifranan ta incorecto pa un cantidad enorme di caso, calculando infeccionnan total, el a bisa. Mundialmente, mas di 2.3 miyon di infeccion y mas di 160mil morto ta confirma. E virus a causa daño economico y social casi sin precedente desde cu su existencia a keda reporta na januari.
Casonan sigiloso
Basa riba casonan conoci, oficialnan di salud a bisa cu e virus usualmente ta causa sintomanan leve of modera similar na grip. Awo evidencia ta aumentando cu un cantidad substancial di hende no ta presenta ningun sintoma en absoluto.
Cientificonan na Iceland a screen 6% di su poblacion pa mira cuanto hende tabatin infeccionnan previamente no detecta, y a haya cu alrededor di 0.7% a test positivo. Asina tambe un 13% di un grupo na riesgo halto di infeccion pa motibo di biahe recien of exposicion na un persona malo.
Abordo di e carrier di avion USS Theodore Roosevelt unda un miembro di tripulacion a muri di e virus, ‘e cifranan ta mas o menos 40 porciento ta asintomatico’, segun vice adm. Phillip Sawyer, comandante interino di operacionnan naval. E ratio por cambia si mas desaroya sintomanan despues, el a adverti.
Na New York, un hospital a test tur muhe na estado yegando pa duna luz durante un periodo di dos siman. Casi 14% di esunnan cu a yega sin sintoma di coronavirus a resulta di tine. Di e 33 caso positivo, 29 no tabatin sintoma ora a haci test, maske algun a desaroya sintoma despues.
Previamente, test di pasaheronan y tripulacion di e crucero Diamond Princess a haya casi mita di esunnan cu a test positivo no tabatin sintoma na e momento ey. Investigadonan a calcula cu 18% di persona infecta no a desaroya ningun sintoma.
Fayonan den metodo
E estudionan aki a usa test cu ta busca pa partinan di e virus di swab di garganta y nanishi, cu por faya algun y caso. Un persona por test negativo un dia si no tin hopi virus pa detecta y despues positivo e siguiente dia.
Tambe por no presenta sintoma na momento cu e persona ta haci test, pero ta aparece despues. Un estudio Hapones a haya mas di mita di esunnan cu no tabatin sintoma ora nan a haci e test, a bira malo despues.
Miho respuestan por bin di test nobo cu ta check sanger pa anticuerponan, substancianan cu e sistema immuun ta traha pa combati e virus. Pero e precision di e test aki, tambe, ainda mester wordo determina.
Diabierna, investigadonan a reporta resultadonan di test di anticuerpo riba 3,300 persona na Santa Clara County na California: entre 1.5% y 2.8% a ser infecta, nan ta bisa. Esey lo nifica cu 48mil di 81mil caso den e condado – mas di 50 biaha e cantidad cu ta confirma.
E estudio no ta formalmente publica of revisa, pero algun cientifico rapidamente a cuestiona esaki. Participantenan a wordo recluta a traves di avisonan di Facebook, cu por atrae hopi hende cu probablemente lo ta positivo, kende tabatin sintoma y kier sa si coronavirus tabata e causa. Algun bario tambe tabatin mas participante cu otronan, y ‘hot spots’ den e condado, cu por a haci infeccionnan parce mas comun cu nan ta na otro luganan.
Barco, sala di maternidad, y condadonan singular no ta provee e data cu por usa pa generalisa locual ta pasando na otro luganan. Y hopi di e figuranan a bin di ‘snapshot’, no investigacion riba poblacionnan amplio a traves di tempo.
Siguiente paso
Test di anticuerponan en particular mester wordo haci ‘den un maneho si prehuicio’ riba gruponan di hende cu ta representativo di condicionnan geografico, racial, social y otronan, Mina a bisa.
CDC y otro gruponan ta planea estudionan asina, y por duna guia conseho di salud publico pa bolbe na bida normal pa hende den cierto areanan.
Si infeccionnan ta mas amplio cu previamente a compronde, ta posibel cu mas hende a desaroya un nivel di inmunidad na e virus. Esey por disminui e transmision a traves di locual ta yama ‘herd immunity’, of inmunidad di grupo, pero cientificonan ta adverti cu tin hopi mas pa siña tocante si infeccion leve ta duna inmunidad, y con largo esaki por dura.
Probablemente lo dura varios luna prome cu por haci test confiabel pa contesta e preguntanan aki y otronan, incluyendo con amplio e infeccionnan ta y e mortalidad corecto di e virus, cual te awo ta unicamente aproxima.
“Si tur a mira e virus anteriormente, probablemente por relaha den e bisindario ey” y reduci distanciamento social, Mina a bisa. “Nos no ta ni cerca di unda nos mester ta”, cu test di anticuerpo ainda, el a bisa.
