Ayera atardi durante un conferencia di prensa a keda conoci e diferente ministerio cu a keda bou e dos partido cu lo forma e gobierno pa e proximo cuater aña.
Asina a indica prome minister demisionario Evelyn Wever-Croes e cual tambe a keda conoci cu e carteranan di Asuntonan General, Innovacion, Organisacion Gubernamental, Infrastructura y Planificacion Teritorial, lo keda bou partido di MEP.
Tambe, otro ministerionan cu lo cay bou partido di MEP ta Finanzas y Cultura, Husticia y Asuntonan Social, Labor y Integracion, Salud Publico y Enseñansa y Deporte.
Pa partido Raiz a keda afirma cu nan lo haya dos ministerio cu ta Integridad, Naturalesa, Transporte y Cuido di Grandinan, e otro ta di Asuntonan Economico, Comunicacion y Desaroyo Sostenibel.
Wever-Croes a destaca cu den liñanan grandi esaki ta e reparticion di ministerionan cu a wordo palabra den tur e tempo aki di formacion y palabracionnan, tambe tin algun di nan como Energia y Turismo cu lo cay bou di MEP pero cu te ainda esakinan no tin ningun departamento di gobierno pero si nan ta bay resorta bou minister. Di mesun manera ministerionan di Agricultura, Sector Primario y Maneho di Desperdicio cu ta bay cay bou responsabilidad di Raiz.
El a indica cu tambe nan ta finalisando e reparticion di tur e diferente departamentonan, institutonan na unda comunidad tambe lo haya algun cambio cu ta bay tuma luga.
Manera a keda conoci, Wever-Croes a entrega na gobernador Alfonso Boekhoudt e acuerdo cu e reparticion di e carteranan y tambe el a duna e cuadro di screening di ministernan y tur e documentacion cu nan tin na e momentonan aki pa asina gobernador lo por haci su evaluacion y nan lo sigui delibera tocante e resultado.
“Nos no ta full cu esey ainda, tin algun documentacion cu mester bin pa asina nos por finalisa e proceso aki y cu lo finalisa den huramentacion di ministernan”, el a sigura.
Di su parti, Ursell Arends lider di partido Raiz a trece dilanti cu di parti di nan plataforma nan ta hopi contento y satisfecho cu e reparticion di cartera, “esaki ta netamente loke Raiz tabata kier y loke nos a pidi, nos a haya tur e combersacion di min pres como formado pa asina akinan facilita pa nos por a haya e carteranan aki”, el a comenta.
Asina mes, el a enfatisa cu e parti cu nan tin di lidera door di Evelyn Wever-Croes, sigur a duna nan e espacio pa nan por a negocia y yega na e carteranan cu Raiz tabata para y insisti “esey pa nos ta mustra tambe cu e solucionnan cu nos kier propone pa Aruba ta solucionnan duradero y ta conta cu e apoyo di ambos partner den coalicion akinan”, Arends a bisa.
