‘Reparticion di ministerio lo bay husto a base di resultado di eleccion’

Ayera seguramente tabata un dia largo pa e formador di e siguiente gobierno di Aruba y lider di partido MEP Evelyn Wever Croes. Despues di henter e ceremonia di huramentacion di tur 21 parlamentarionan pa un parlamento nobo, e mester a bolbe reuni cu gobernador pa un otro briefing riba e proceso di formacion. Segun sra. Wever Croes a declara na prensa ayera, nan a informa gobernador cu nan ta mas avansa na momentonan aki cu e programa di gobernacion.

A base di e reunion regular aki ayera cu gobernador di Aruba, e formador a splica e gobernador cu nan ta un poco mas avansa cu e programa di gobernacion. ” Nos tin e caba den draft den man di tur e partidonan pa word revisa. Nos ta spera di keda cla hopi lihe cu e programa aki.” E siguiente fase pues ta e reparticion di cartera unda cu sra. Wever- Croes a splica gobernador caba con ta bay sigui na trata cu esey.  “Riba e parti di reparticion di cartera por ehempel nos a identifica cua ta e ministerionan  mas grandi, anto e ministerionan mas chikito. Nos tin un lista di nan y defini e cantidad. Nos ta bisa e ora e refleho di e resultado di eleccion, e 9-2-1, bo tin cu wak e bek den e cantidad di ministerio cu ta bay wordo reparti,” sra. Wever- Croes a bisa. El a sigui expresa cu mester duna nan un espacio pasobra ta negociando pa e miho interes pa Aruba, y e partidonan ta trata di defende nan propio interes mas tanto posibel.  “Bo tin cu bay na 12 minister si bo kier haya e 9 -2-1,  pero nos no ta bay na 12 minister. Nos ta purba want’e na 7, esey ta mi deseo personal. Si mester  hinca ‘awa den biña’  anto e bira 8 minister mes, bo lo haya esaki bek den e cantidad di carteranan. Esey por kiermen cu tin un minister cu lo haya dos ministerio. Pues bo tin cu pega nan mas na otro.” El a sigui bisa cu nan no ta den henter e proceso di reparticion ainda pero ta enfatisa cu den esaki lo tene cuenta cu e refleho di resultado di eleccion.

Negociacion di ‘Media stilte’
E partidonan manera conoci tin un negociacion di ‘media stilte’ mientras cu ta den e proceso di forma gobierno. Pa loke ta trata formacion ta solamente e formador ta trece dilanti ta kico tur ta pasando durante e proceso, pues den e caso aki solamente sra. Evelyn Wever Croes.  Colega di prensa di NoticiaCla.Com a puntra por ehempel si e hecho cu sr. Otmar Oduber ta ketobay haci ruedanan di prensa no ta stroba e negociacion di ‘media stilte’ . Evelyn: “Como lider di su partido e tin responsabilidad di su mes pa dirigi su mes na su votadornan y specialmente si ta necesario pa trankilisa e votadornan. Pasobra cierto momento tin hopi comocion y nos ta djis negociando.”  E ta sigui expresa cu como partido MEP, nan ta tuma e caminda cauteloso. Ainda no ta asina leu pa reparti y ademas no a cuminsa cu proceso di screening pa yega asina leu.

‘Proceso di screening ta bastante intensivo’
Sra. Wever-Croes a bay un rato den detaye riba e proceso di screening di minister y con esaki ta bay tuma luga. E proceso di screening segun sra. Wever- Croes ta uno bastante intensivo cual e como formador lo tin cu pidi Procurador General pa un conseho/investigacion. Mester pidi Departamento di Impuesto pa un investigacion, como tambe un investigacion di seguridad nacional. Ora investigacionnan bin cerca dje, lo mester sinta hunto cu cada candidato individual y papia di e resultadonan di e investigacionnan aki. “E PG no ta bay bisa ami cu e ta haya sra. A of sr. B ministeriabel of no.  E ta traha un rapport di kico e tin den su file di e persona. E otro departamentonan tambe lo traha nan rapport anto como formador ta mi responsabilidad pa concentra riba e parti di integridad,” e ta bisa.
El a sigui expresa cu nan no kier pa ripiti locual a pasa cu minister Paul Croes. “Mi no ta desea esey pa ningun hende y tanten mi por evita cu esey ta pasa mi lo haci’e.” Unabes e formador keda cla cu su reportahe, e ultimo palabra manera conoci ta den man di gobernador di Aruba. E ta dicidi si e persona ta ministeriabel si of no , a base di tur informacion colecta. “P’esey ami ta kere cu e fase aki ta hopi prudente pa nos ta cauteloso pasobra pa bay bisa ken bo kier pa bira minister of no,  ta miho pa laga e proceso cana su caminda. Ami no por wordo poni bao presion como formador, ni gobernador ora cu e tuma su decision. Pues ban laga e proceso cana su caminda. Ta cuestion di un par di dia,” sra. Wever Croes a conclui na prensa.